थुगुसी सिक्किमया निगू जिल्लाय् यँयाः

येँ – नेपालं पिने न्हापांखुसी यँयाः पर्व न्यायेकेगु शुरु याःगु थाय् सिक्किमय् थुगुसी धाःसा निगू थासय् यँयाः न्यायेकेगु ज्या जुल । थुगुसी निसें सिक्किमया देन्ताम नांगु मेगु जिल्लाय् नं तःजिक यँयाः न्यायेकेगु ज्या जूगु खः । सिक्किमया राजधानी गान्तोकय् दँय्दसं यँयाः न्यायेका वयाच्वंगु दुसा थुगुसी रथ सालाः न्यायेकूगु दु ।

तर देन्तामय् धाःसा थुगुसी न्हापांखुसी यँयाः न्यायेकूगु जुयाः गान्तोकय् स्वयां तःजिक ज्याझ्वः याःगु खँ सीदुगु दु । गान्तोकय् छतँ जक दुगु कुमारीया रथ सालीगु खःसा देन्तामय् थन येँय् थें स्वतँ हे दुगु रथ दयेकाः कुमारी साःगु खः । रथय् दुने वर्तमान कुमारीया किपा तया हःगु खः ।

देन्तामया यँयाः पर्वय् मुख्यमन्त्री प्रेम सिंह गोलेयात मूपाहांया रुपय् सःता हःगु खःसां वय्कः वये मलानाः जहान शारदा तामाङयात छ्वया हःगु खः । जात्राय् जनस्वास्थ्य मन्त्री भीमहाङ सुब्बा, शहरी विकास मन्त्री अरुण उप्रेति, कृषि मन्त्री लोकनाथ शर्मा लगायत सांसद व सिक्किम सरकारया उच्च पदाधिकारीतय्सं ब्वति कयादीगु खः ।

ज्याझ्वलय् लाखे प्याखं पिकायेगु लिसें धिमे बाजं थानाः न्ह्यइपुकेगु ज्या नं जूगु खः । उगु ज्याझ्वलय् नेपाःया संस्कृति–विद्पिं गणेशराम लाछि, बालमुकुन्द प्रजापति व शर्मिला महर्जन लगायत १२ म्ह सिक्किमी नेवाःतय्त हनेगु ज्या जूगु खः । अथे हे नेपालं झाःम्ह गणेशराम लाछिं थःगु संस्था ‘दबुलि नेपाल’ पाखें सिक्किमया मुख्यमन्त्रीयात हनापौ नं देछानादीगु खः ।

सम्बन्धित बुखँ

LEAVE YOUR COMMENTS