यातायात व्यवसायीतय् आन्दोलन राजनीतिं प्रेरित !

येँ – कांग्रेस लिसे स्वापू दुगु थीथी गैरसरकारी संघसंस्थां वर्तमान सरकार विरुद्ध आन्दोलन यायेगु तयारी यानाच्वंगु दु । थ्व आन्दोलनय् सरकारं यातायात संगठनतय्त कयाः कडा पलाः ल्ह्वंगु विरुद्ध आन्दोलनय् कुहां वःगु नेपाल राष्ट्रिय महासंघया सार्वजनिक यातायात थप्प यायेगु आन्दोलनं लानाच्वंगु खँ धाःगु दु । यातायात व्यवसायीतय् थीथी सगठनया नेतृत्वय् नेपाली कांग्रेस व वामपन्थी समर्थकतय् लानाच्वंगु दु ।

उकिं यानाः महासंघं न्ह्याकेत्यंगु आन्दोलन नं आः निगू धारय् वनाच्वंगु दु । उकथं हे नेपाल आदिवासी जनजाति महासंघं न्ह्याकेत्यंगु आन्दोलन नं निगू धारय् वना च्वंगु खँ धाःगु दु । अथे जूगुलिं जनजाति महासंघं नं गज्याःगु कथंया आन्दोलन यायेगु धइगु बारे अन्यौल ब्वलनाच्वंगु दु ।

यातायात व्यवसायी महासंघय् कांग्रेसलिसे सतिपिं नेतृत्वकर्तातय्सं गुगुं नं हालतय् सरकारयात झुके यायेमाः धकाः आन्दोलनया स्वरुप कडा यायेमाः धयाच्वंगु दुसा वामपन्थीत धाःसा सफ्ट आन्दोलन यानाः सरकारलिसे वार्तां हे समस्या ज्यंकेमाः धइगु पक्षय् वनाच्वंगु दु । महासंघया निम्ह पदाधिकारीतय्सं धाःसा धाःसा थःपिनिगु आन्दोलन राजनतिक रुपं गाइड जुइमजिउ धकाः निगुलिं खेमाय् मच्वंसें सुम्क च्वनाच्वंगु खँ कनादीगु दु ।

थःगु नां कने चाहे मजूम्ह छम्ह पदाधिकारीं धयादीगु दु, ‘न्हापा छगू रुटय् न्हूगु बसयात रुटपर्मिट बिइवंं याइगु आन्दोलन निर्णायक जुइगु खः । तर थ्व पालय् सरकारं सिन्डिकेट त्वाःथलेगु निर्णय यासें देय्न्यंकं हे रुटपर्मिट खुला बिउसां आन्दोलन ताःलाके मफयाच्वंगु दु । थुकिया मू कारण राजनैतिक रुपं प्रेरित जुयाः खः ।’

सरकारं यातायात कार्यविधि निर्देशिका हयेधुंकाः नं आन्दोलन यायेगु निंतिं ताः ई कयाच्वंगु धयागु कांग्रेस व वामपन्थी दथुइ ब्वलंगु विवादया हुनिं जूगु खँ व्यवसायीतय्सं धाःगु दु । आः महासंघया नेतृत्व यानाच्वंम्ह अध्यक्ष योगेन्द्र कर्माचार्य कांग्रेस सतिम्ह जक मखु वंगु स्थानीय चुनावय् बनेपा नगरपालिकाया मेयरया दावेदार नं खः । व स्वयां न्ह्यः वय्कः प्रजातान्त्रिक यातायात व्यवसायी संघया अध्यक्ष खः ।

अथेहे महासंघया सचिव सरोज सिटौला नेकपा (माओवादी) समर्थित खःसा नेपाल पेट्रोलियम ढुवानी व्यवसायी महासंघया अध्यक्ष खगेश्वर बोहरा धाःसा कांग्रेसया सक्रिय कार्यकर्ता खः । वय्कः नं वंगू स्थानीय निकायया चुनावय् भिमदत्त नगरपालिकाया मेयर दावेदार खः । अथेहे सचिव विश्व अर्याल नं कांग्रेसया हे कार्यकर्ता खः ।

अर्याल धादिङं कांग्रेसपाखे प्रतिनिधिसभाया उम्मेदवार जूगु खः । थुकथं यातायात व्यवसायी महासंघया आन्दोलन राजनीतिक रुपं प्रेरित जूगुलिं आन्दोलन ताः मलाइगु सम्भावना अप्वया वनाच्वंगु दुसा आन्दोलनयात जनसमर्थन मदुगुलिं यानाः नं आन्दोलन गुगु दिशाय् वनीगु खः धइगु न्ह्यसः ब्वलनाच्वंगु दु ।