लगानीकर्तातय्सं नेप्से घेरे यात, सोमवाः नं नेप्से ६ अंकं क्वय्

येँ – सोमवाः शेयर लगानीकतातय्सं शेयर बजाः सुधारया माग यासें नेपाल स्टक एक्सचेञ्जय् घेराउ याःगु दु । लगानीकर्तातय्सं अनलाइन कारोबार प्रणालीइ समस्या वःगु धासें नेप्से घेरे याःगु खः । उमिसं अनलाइन प्रणाली तत्कालन कार्यान्वयनय् हयेमाःगु माग याःगु दु । लगानीकर्तातय्सं नेप्से घेरे याःगु न्हि सोमवाः नं शेयर बजाः धाःसा न्हियान्हिथं थें कुहां हे वंगु दु ।

सोमवाः समग्र शेयर बजाःया मापन याइगु नेप्से परिसूचक ६.३५ अंकं कुहां वनेवं परिसूचक आः ११६०.२८ अंकय् थ्यं वःगु दु । क वर्गया कम्पनीतय् मापन याइगु सेन्सेटिभ इन्डेक्स नं १.३ अंकं कुहां वनाः २४६.७२ अंकय् थ्यंगु दु । नेप्से कुहां वःसां कारोवार रकमय् धाःसा भचा थहां वंगु दु । सोमवाः ३० करोडढ ८४ लाख ९५ हजार तका बराबरया ९ लाख ९१ हजार ७३० कित्ता शेयर न्यायेमी जूगु खः ।

मुक्कं १५५ गू कम्पनीया शेयर कारोवार जूगुलिं निगू उपसमूहया कारोवार जक थहां वंगु खनेदुगु खः । म्हिगः दकलय् अप्वः नेपाल हाइड्रो डेभलपर्स, प्रोग्रेसिफ फाइनान्स व नाडेप लघुवित्त वित्तीय संस्थाया शेयरधनीतय्सं कमे याये खनसा नेपाल सेवा लघुवित्त, एनएमबी माइक्रोफाइनानस, मिर्मिर लघुवित्तया शेयरधनीतय्सं अप्वः द्यापं फयेमाल ।