छु बैंकया सिइओया गुलि तलब ?

येँ – छगू बैंकया प्रमुख कार्यकारी अधिकृतया तलब गुलि जुइ ? आःतक पिहां वःगु प्रतिवेदन कथं छम्ह प्रमुख कार्यकारी अधिकृतया तलब दँय् निगू करोड स्वयां अप्वः दु । आःतक खुगू बैंकं थःगु बैंकया प्रमुख कार्यकारीया तलब सार्वजनिक याःगु दु । थुपिं बैंकतय्सं थःपिनिगु वार्षिक प्रतिवेदन सार्वजनिक यायेगु झ्वलय् प्र्रमुख कार्यकारीया तलब सुविधा नं सार्वजनिक याःगु खः ।

आःतक सार्वजनिक जूगु प्रतिवेदन कथं दकलय् अप्वः तलब नइम्ह धाःसा बैंक अफ काठमाडौंया कार्यकारी प्रमुख जुयाच्वंगु दु । बैंक अफ काठमाडौं, सानिमा बैंक, कुमारी बैंक, माछापुच्छ«े बैंक, सिटिजन्स बैंक व एनआइसी एसिया बैंकं आःतक थःपिनिगु वार्षिक प्रतिवेदन सार्वजनिक यायेधुंकूगु दु ।

थ्व वार्षिक प्रतिवेदन कथं बैंक अफ काठमाडौंया प्रमुख कार्यकारी अधिकृतया वार्षिक तलब सुविधा जक निगू करोड ३२ लाख ८५ हजार तका दु । थ्व धुंकाः कुमारी बैंकया प्रमुख कार्यकारीया तलब दँय् २ करोड १४ लाख ६३ हजार दुसा एनआइसी एसियाया २ करोड १३ लाख ६७ हजार तका दु । अथेहे सानिमा बैंकया प्रमुख कार्यकारी अधिकृतया तलब २ करोड ८ लाख ३९ हजार दु ।

माछापुच्छ«े व सिजिजन्स बैंकया प्रमुख कार्यकारीतय् तलब धाःसा मेगु प्यंगू बैंकया स्वयां थ्यंमथ्यं बछि हे जक दु । माछापुच्छ«े बैंकया प्रमुख कार्यकारीया तलब दँय् १ करोड १७ लाख ९८ हजार दुसा सिटिजन्स बैंकया प्रमुख कार्यकारीया तलब दँय् ९२ लाख १२ हजार दु । थुकी नाफाया बोनस व कल्याणकारी कोषया सुविधा धाःसा जोडे जुयाच्वंगु मदुनि ।