‘बजेट कायेत दबाब मगात’

येँ (नेपालभाषा टाइम्स)÷ येँ महानगरपालिकाया उपमेयर सुनिता डंगोलं नेवाः ख्यलं येँ महानगरपालिकां बजेट कायेगु निंतिं दबाब मगाःगु खँ धयादीगु दु । नेवाः सांस्कृतिक ज्ञानकोश विमोचन ज्याझ्वलय् न्ववानादिसें वय्कलं नेवाः ख्यःया तःगू ज्याझ्वः थःम्हं बजेटय् दुथ्याकागु खःसां उकीयात थःम्हं हे मसीक चीकेगु यानाच्वंगु खँ धयादिसें बजेट कायेगु निंतिं नेवाः ख्यलं येँ महानगरपालिकाय् दबाब बीमाःगु खँ धयादीगु खः ।

वय्कलं धयादिल, ‘सांस्कृतिक ज्ञानकोशया नेपाली अनुवादया निंतिं थुगुसी हे बजेटय् दुथ्याका छ्वयागु खः, तर बजेट पिहां वःबलय् उकी दुमथ्यात । अथेहे मेमेगु नं यक्व हे नेवाः ख्यःया ज्याझ्वःत बजेटय् दुथ्याका छ्वयागु खःसां उकिया काटे यानाहल । थ्व सुनां यानाच्वन ? छाय् याना च्वन धयागु खँ वाःचायेकाः नेवाः ख्यलं नं दबाब बीमाःगु दु ।’

‘येँ महानगरपालिकां बजेट कायेगु धयागु फ्वनाः कायेगु मखु, थ्व झीगु हक अधिकार खः । झीसं पुलातयागु कर पाखें हे झीगु ज्याझ्वः यायेत ध्यबा कायेगु खः’ धासें वय्कलं धयादिल, ‘तर नेवाःख्यःया निंतिं धकाः दुथ्याकागु यक्व हे बजेट क्वपालाः वल । थ्व बारे जिं कार्यपालिका बैठकय् नं न्ववानागु खः, तर याकःचा जक हालां मगात, आः सकलें वयाः सः तयेमाःगु दु ।’

बजेटय् दुथ्याकेगु निंतिं बजेट न्ह्यः यक्व हे मनूत थःथाय् वयाः धाः वइगु, तर बजेटय् दुमथ्यात धाःसा छाय् दुमथ्यात धकाः तकं न्यं वइमखु धासें वय्कलं आः नेवाः ख्यःया कार्यक्रम बजेटय् दुथ्याकेगु निंतिं छम्ह निम्ह मखु, सकलें मुनाः येँ महानगरपालिकाय् छाय् बजेटय् दुमथ्यात धकाः धाः वयेमाःगु खँ वय्कलं धयादीगु खः ।

नेपालभाषा टाइम्स

च्वमिया मेमेगु

• वतु त्वालय् दन्त शिविर
• पासा पुचः गुथि लन्दनया न्हूधाः
• ज्यापु समाजया निर्वतमान नायः तीर्थलालया अबु मंत
• ‘मौसम पूर्वानुमानयात गम्भीर रुपं मकाःगुलिं यक्व क्षति जूगु खः’ – वरिष्ठ माैसमविद् मणिरत्न शाक्य
• नखःचखःया दिं कायेत झीगु संस्कृतिया मौलिक परम्परा म्हसीकेमाल