छगः हे गाडीइ जोरबिजोर नम्बर !

येँ (नेपालभाषा टाइम्स) – स्वनिगःया जिल्ला प्रशासनं निषेधाज्ञा अन्त्य जूगु घोषणा याःसां सवारी साधनय् जोरविजोर प्रणाली धाःसा कायम हे दनि । थज्याःगु अवस्थाय् छम्ह व्यापारीं धाःसा थःगु सवारी साधनय् नक्कली नम्बर प्लेट तयाः जोरविजोर निन्हुं हे गाडी चले यानाच्वंगु लूगु दु ।

महानगरीय प्रहरी वृत्त कालिमाटीं विशेष सुचंया आधारय् उकथं गाडी चले यानाच्वंम्ह सुरेन्द्रकुमार अग्रवालयात ज्वंगु खः । अग्रवाल बैशाली प्रोडक्सन व खोली इम्पोरियम कम्पनी चायेकाः ज्या यानाच्वंम्ह खः । कालिमाटी प्रहरीया कथं अग्रवालं बा. ११ च ६६५० व बा. ७ च ४४५४ नम्बरया गाडीयात बा. ११ च ६५५७ व बा. ७ च ४४५५ नम्बरया नक्कली प्लेट तयाः गाडी चले यानाच्वंगु खः ।

निगलं गाडी वर्ल्ड ट्रेड सेन्टर व चाइना टाउनया पार्किङ क्षेत्रं ज्वंगु खः । ज्वंम्ह अग्रवालयात यातायात व्यवस्था ऐन कथं कारबाही जुइगु खँ प्रहरीं धाःगु दु ।