यँयाःयात पाहांपिं सःतेगु तयारी

येँ(नेपालभाषा टाइम्स)÷येँ महानगरपालिकां यँयाः नखः स्वयेत पाहांपिं ब्वनेत आन्तरिक तयारी न्ह्याकूगु दु । येँ महानगरं थुगुसी यँयाः नखः स्वयेत भगिनी सम्बन्ध दुगु अन्तर्राष्ट्रिय नगरया प्रमुखतय्त ब्वनेगुकथं तयारी न्ह्याकूगु खः ।

वंगु साउन १ गतेया महानगरपालिकाया खुक्वःगु कार्यपालिकाया बैठकं थुगुसीया यँयाःया इलय् भगिनी महानगरलिसे भगिनी सम्बन्ध दुगु नगरया प्रमुख वा प्रतिनिधियात यँयाः नखः स्वयेत ब्वनेगु निर्णय याःगु खः । उगु निर्णय कार्यान्वयन यायेत महानगर प्रमुख शाहया अध्यक्षताय् छगू मूल समारोह समिति नं गठन याःगु दुसा समितिइ दुजःकथं उपप्रमुख, प्रमुख प्रशासकीय अधिकृत, वडाअध्यक्ष व कार्यपालिकाया दुजःपिं च्वनादीगु दु ।

महानगरं थुगुसीया यँयाः जात्राय् भगिनी सम्बन्ध दुगु १८ गू नगरलिसें दक्षिण एशियाली राष्ट्र अर्थात सार्क राष्ट्रया न्हय्गू राजधानी सहरया प्रमुख यानाः मुक्कं २५ गू नगरया प्रमुखयात ब्वनेगु निर्णय याःगु दु । नीन्यागू नगरया प्रमुखलिसें प्यम्ह प्रतिनिधिनापं यानाm मुक्कं सछिम्ह पाहांपिं यँयाः स्वयेत ब्वनेगु तयारी महानगरं याःगु दु ।

२०७६ सालय् निवर्तमान महानगर प्रमुख विद्यासुन्दर शाक्यं न्हापांखुसी यँयाःया नखः स्वयेत अन्तर्राष्ट्रिय भगिनी सम्बन्ध दुगु खुगू देय्या १३ गू नगरयात ब्वंगु खः। उकीमध्ये न्यागू देय्या ११ गू नगरया प्रमुख, उपप्रमुख व प्रतिनिधि यानाः ४१ म्ह सहभागि जुयादीगु खः ।

येँ महानगरया भगिनी सम्बन्ध दुगु देय्मध्ये दकलय् न्ह्यःने चीन दु । चीनया न्हय्गू नगरलिसे महानगरया भगिनी सम्बन्ध दुसा निगूगु थासय् दुगु अमेरिकाया प्यंगू सहरलिसे भगिनी सम्बन्ध दु । अथे हे जापानया मात्सुमोतो, दक्षिण कोरियाया सियोल, उत्तर कोरिया प्योङयोङ, म्यान्मारया यांगुन, भारतया वाराणसी स्पेनया म्याड्रिड व बेलारुसया मिन्स्क सहरलिसे नं येँ महानगरया भगिनी सम्बन्ध दु ।