मन्त्री श्रेष्ठयात ज्ञापन पौ
येँ(नेपालभाषा टाइम्स)- नेपाल सरकारया नवनियुक्त संस्कृति, पर्यटन व नागरिक उड्डयन मन्त्री जीवनराम श्रेष्ठयात छपु ज्ञापन पौ लःल्हाःगु दु । नेवाः जागरण मञ्चं मन्त्री श्रेष्ठयात न्यागू बुँदा सहितया ज्ञापन पौ लःल्हाःगु खः ।
नवनियुक्त मन्त्री श्रेष्ठयात भिंतुना देछायेत ग्वसाः ग्वःगु ज्याझ्वलय् मञ्चं ज्ञापन पौ लःल्हाःगु खः । मन्त्री श्रेष्ठ स्वयं छम्ह भाषा, जातिया आन्दोलनलिसे स्वानाच्वंम्ह व्यक्तिया ल्याखं स्वनिगःया आदिवासी नेवाः जाति, थनया जनताया आकांक्षाकथं ज्या याइ धइगु भलसा कयागु खँ ज्ञापन पती न्ह्यथनातःगु दु ।
ज्ञापन पौ लःल्हाना कासें मन्त्री श्रेष्ठं भाषा, संस्कृति, सम्पदाया संरक्षण व संवद्र्धनया खँय् नेवाः न्ह्यलुवातनापं सहलह यानाः योजना दयेकाः वनेगु खँ कनादीगु खः ।
मन्त्री श्रेष्ठयात लःल्हाःगु ज्ञापन पती नेवाःतय् संस्कृति व गुथियात प्रहार यायेकथं भूमिसुधार मन्त्रालयं हःगु व आः हाकनं हयेगु तयारी यानाच्वंगु गुथि विधेयक पनेमाःगु, सरोकारवाला नेवाःत नाप सहलह यानाः गुथि परम्परा व गुथिया स्वामित्वय् असर, दखल मयायेकथं हयेमाःगु, स्वनिगःया कला, संस्कृति, परम्परा, सम्पदा देय्या हे धुकू जूगुलिं उकिया संरक्षण, संवद्र्धन व प्रवद्र्धनया निंतिं विशेष योजना हयेमाःगु खँ ज्ञापन पती न्ह्यथनातःगु दु ।
अथे हे भुखाय् लिपा क्षति जूगु थनया ल्यं दुगु धार्मिक, सांस्कृतिक सम्पदालिसेंया संरचना निर्माणयात प्राथमिकता बीमाःगु, यँयाः कुमारिया खः सालेगु नापं जनबहाः द्यः, झिंनिदँया जात्राय् पिहां वइगु द्यःप्याखं संचालनया निंतिं विशेष कोषया व्यवस्था यायमोःगु, नेपाल संवत्या न्हूदँया निंतिं बिस्कं कोषया व्यवस्था यायेमाःगु व मन्त्रालय अन्तर्गतया थीथी निकायय् राजनीतिक नियुक्ति यायेबलय् नेवाःतय्त विशेष प्राथमिकता बीमाःगु खँ न्ह्यथनातःगु दु ।
मञ्चया नायः सुजिब वज्राचार्यया सभापतित्वय् जूगु ज्याझ्वलय् जनकवि दुर्गालाल श्रेष्ठ, नेवाः न्ह्यलुवा मल्ल के. सुन्दर, पुलांम्ह राज्यमन्त्री तीर्थराम डंगोललिसें आपालं भाषिक कार्यकर्तातय् उपस्थिति दुगु खः
LEAVE YOUR COMMENTS