यँयाः स्वयेत विदेशी मेयरत सःतीगु

येँ (नेपालभाषा टाइम्स)-आः वइगु यँयाः जात्रा स्वयेगु लागिं येँ महानगरपालिकां थःलिसे भगिनी सम्बन्ध दुगु थीथी नगरया मेयर उपमेयरत येँय् सःतीगु जूगु दु । येँ मनपाया म्हिगः च्वंगु कार्यपालिकाया बैठकं थ्व निर्णय याःगु खः ।

थ्व स्वयां न्ह्यः मनपाय् विद्यासुन्दर शाक्य मेयर जुयादीगु इलय् वय्कलं हे भगिनी सम्बन्ध दुगु नगरया मेयर, उपमेयरतय्त येँयाः जात्रा स्वयेगु लागिं ब्वनादीगु खः । उगु इलय् भारत, भूटान व चीनया थीथी नगरया मेयर उपमेयरलिसें मेमेगु देय्या स्थानीय सरकारया प्रतिनिधिपिं येँय् वःगु खः । वय्कःपिंत मनपां गद्दी बैठकय् तयाः जात्रा अवलोकन याकूगु खःसा उकिया नापनापं येँया भित्री नगर लिसें यल व ख्वपया सम्पदा क्षेत्र नं भ्रमण याकूगु खः ।

यँयाः स्वयेत वःपिं नगर प्रमुखत मध्ये ल्हासा नगरं येँयात निगः स्क्राय्च मेसिन उपहार नं बियाथकूगु खः । वयां लिपाया दँय् कोरोना महामारीया कारणं विदशी मेयरपिंत सःतेगु ज्या मजुल ।

आः येँ मनपाया न्हूम्ह मेयर बालेन्द्र साहं नं पुलांगु हे ज्याझ्वःयात निरन्तरता बिसें यँयाः स्वयेत विदेशी मेयर उपमेयरपिंत सःतेगु निर्णय याःगु खः । यँयाःयात अन्तर्राष्ट्रियकरण यायेगु ताः तयाः थ्व ज्याझ्वः यायेत्यंगु खः ।