भ्वँतया बसपार्क जःखः फोहर वायेके मबीगु

भ्वँत – बसपार्क जःखः स्थानीय वासिन्दा व नगरपालिकां हे फोहोर मुंकेगु याना वयाच्वंगुलिं स्थानीयवासी व व्यवसायीपाखें आवंनिसें सुयातं फोहोर वायेके बीमखु धकाः पनाबिउगु दु ।न्हापा फोहोर वायेगु यानाच्वंगु काभ्रेपलाञ्चोकया श्रीखण्डपुरया सूचना प्रविधि केन्द्र न्ह्यःने तसकं दुर्गन्धित जूगु धासें छुं महिना न्ह्यवंनिसें अनया वासिन्दां फोहोर वायेके मबीवं नगरपालिकां बसपार्कय् फोहोर जम्मा यानाः मेथाय् वायेगु यानाच्वंगु खः ।

नगर दुनेया बजारं हइगु फुक्कं फोहोर छथाय् मुंकेगु व अनं मेथाय् यंकेगु झ्वलय् तसकं दर्गन्ध वयाः च्वने मफयेवं नगरपालिका व स्थानीयवासीयात तकं फोहोर वायेके मबीत बसपार्क जःखःया व्यवसायी व स्थानीयवासीं गस्ती तकं यायेगु यानाच्वंगु दु । फोहोर वायेगु झ्वलय् उगु लागाय् सीम्ह जनावर तकं वायेगु यानाच्वंगुलिं थप दुर्गन्ध अप्वगुलिं सुयातं उगु लागाय् फोहोर वायेके मबीगु स्थानीय विकास मानन्धरं कनादीगु दु ।

वय्कःया कथं नगरपालिकां अन मुनिगु फोहोरया व्यवस्थापन याकनं स्वयां याकनं यायेमाःगु माग यासें उगु थासय् याकनं स्वच्छ वातावरण कायम यायेमाः धयादिल । मेम्ह स्थानीय वासिन्दा राजेन्द्र तिमल्सिनां फोहोरया कारणं जःखः च्वंपिनिगु व्यापार व्यवसाय तकं नकारात्मक लिच्वः लाःगु धासें फोहोरया व्यवस्थापन याकनं यायेमाःगु माग नगरपालिकायाके यानादिल ।

अथेहे बसपार्कया व्यवासयी अशोक सिंहं फोहोरया कारणं व्यवसायनिसें लिकसं दुगु विद्यालयया विद्यार्थीपिंत नं लिच्वः लाकाच्वंगु खँ कनादिल । वय्कलं फोहोरया कारणं विद्यालय आखः ब्वनेत नं मास्क तयाः ब्वनेमाःगृु अवस्था जुयाच्वंगु धासें याकनं फोहोर व्यवस्थापन यायेमाःगु माग यानादिल । सूचना तथा प्रविधि केन्द्रय् फोहोर वायेगु ज्या पनेधुंकाः बनेपा नगरपालिकां फाहोर व्यवस्थापन यायेगु उचित थाय् मालाच्वंगु खँ धाःगु दु ।

 

सम्बन्धित बुखँ

LEAVE YOUR COMMENTS