इलामया चुनाव रोचक जुइगु
इलाम (नेपालभाषा टाइम्स)÷ इलाम क्षेत्र नं. २ स उपचुनाव अतिकं रोचक जुइगु सम्भावना ब्वलंगु दु । जिल्लाय् चुनावया चहलपहल शुरु जूगु दुसा थीथी पार्टीया वरिष्ठ नेतात हे जिल्लाय् वयाः चाःहिलेगु शुरु यायेधुंकूगु दु ।
एमालेया उपाध्यक्ष सुवास नेम्बाङ मदुगुलिं उपनिर्वाचन जुइत्यंगु थ्व क्षेत्रय् एमालेपाखें नेम्बाङया हे ल्याय्म्हम्ह काय सुहाङ नेम्बाङयात उम्मेदवार दयेकूगु दुसा राष्ट्रिय स्वतन्त्र पार्टीपाखें ल्याय्म्हम्ह पत्रकार मिलन लिम्बुयात उम्मेदवार घोषणा याःगु दु । शनिवाः थनया चोक बजारय् छगू सभा यासें रास्वपां लिम्बुयात थःपिनि उम्मेदवार धकाः सार्वजनिक घोषणा याःगु खः । मेखे पहिचानवादी आन्दोलनकारीतय्पाखें डकेन्द्र थेगेमयात उम्मेदवार घोषणा यायेधुंकूगु दु । कांग्रेसं आः तक उम्मेदवार क्वःछी मफुनि । अथे खःसां आः तक पुलांम्ह हे उम्मेदवार डम्बर खड्काया नां न्ह्यःने लानाच्वंगु दु ।
एमालें सुहाङ नेम्बाङयात उम्मेदवार दयेकूगु खँय् थनया पुलांपिं एमाले नेता कार्यकर्तात धाःसा रुष्ट जुयाच्वंगु दु । थःपिंसं पार्टीया लागिं वर्षौं न्ह्यवंनिसें ज्या यानाच्वनागु खःसां आः टिकट धाःसा न्हूम्ह मनूयात बिल धकाः उपिं तंचायाच्वंगु दु । तंचाःपिं कार्यकर्तातय्सं मेथाय् भोट बीगु सम्भावना दुगु खँ धाःगु दु ।
पहिचानवादी उम्मेदवार डेकेन्द्र थेगेमयात सकलें पहिचानवादीतय्सं न्ह्यःने हयाच्वंगु दुसां वय्कः त्या हे त्याइ धकाः धाःसा स्वयम् पहिचानवादीतय्सं नं धयाच्वंगु मदु । वय्कलं प्रतिष्ठापूर्ण मत हये फइगु अनुमान जुयाच्वंगु दु । तर उलि जक जूसां राज्यसत्तायात इलामया पहिचानवादीतय्गु सन्देश धाःसा वनीगु आशा यानातःगु दु ।
थ्व झ्वलय् रास्वपाया उम्मेदवार मिलन लिम्बुं थः नं पहिचान पक्षधर खः धासें थेगेमयात नं थःगु पक्षय् हयेत स्वयाच्वंगु खनेदु । रास्वपां थःगु सम्पूर्ण ध्यान इलामय् केन्द्रित यानाच्वंगु नं खनेदु । लिम्बुया उम्मेदवारी घोषणा ज्याझ्वलय् पार्टी सभापति लिसें उपप्रधानमन्त्री रवि लामिछाने, उपसभापति डा. स्वर्णिम वाग्ले लगायतया नेतात समेत वयाः सम्बोधन यानादीगु खः ।
रास्वपाया उपमहासचिव कविन्द्र बुर्लाकोटीं धाःसा प्रदेश १ य् पहिचानवादीया पकड दुसां इलाम–२ या अधिकांश मतदातात धाःसा पहिचान पक्षधर मखु धकाः दावी यानादीगु दु ।वंगु आम चुनावय् पहिचानवादीया उम्मेदवार मदु । आः एमाले व रास्वपापाखें नं युवायात उम्मेदवार दयेकूगु जुयाः चुनावया गतिविधि रोचक जुइगु अनुमान यानाच्वंगु दु ।
LEAVE YOUR COMMENTS