ने. सं. ११४४ कौलाथ्व षष्ठी -

केल त्वालय् प्यंगःथां व भाषा निभाःया झ्वाता

येँ(नेपालभाषा टाइम्स)- येँ महानगर पालिका २५ वडाया जनबहाःस्थित केलत्वालय् नेपालभाषा व साहित्यया पुनःजागरणकालया प्यगःथांलिसें भाषा निभाः पे्रमबहादुर कसाःया झ्वाता पलिस्था याःगु दु । नासः दबू जिर्णोद्वार समितिया ग्वसालय् वंगु शनिवाः जूगु छगू ज्याझ्वःया दथुइ उगु झ्वाता उलेज्या याःगु खः ।

ज्याझ्वलय् भाषा, साहित्यया पुनःजागरणकालया प्यंगःथां व भाषा निभाः कसाःया झ्वाता थीथी व्यक्तित्वपिंसं उलेज्या यानादीगु खः । प्यंगःथांमध्ये महाकवि सिद्धिदास महाजुया झ्वाता जनकवि दुर्गालाल श्रेष्ठ, पण्डित निष्ठानन्द वज्राचार्यया झ्वाता नेपाली कांग्रेसया नेतालिसें पुलांम्ह उपप्रधानमन्त्री प्रकाशमान सिंह, कवि योगवीर सिंह कसाःया झ्वाता बागमति प्रदेशया खानेपानी, उर्जा व सिचाइ मन्त्री वसन्त मानन्धर, मास्तर जगतसुन्दर मल्लया झ्वाता येँ महानगरपालिकाया निवर्तमान प्रमुख विद्यासुन्दर शाक्यं उलेज्या यानादीगु खःसा भाषा निभाः पे्रमबहादुर कसाःया झ्वाता २५ वडाया निवर्तमान वडाअध्यक्ष नीलकाजी शाक्यं उलेज्या यानादीगु खः ।

२५ वडाया जनबहाःस्थित केल त्वालय् च्वंगु नासः दबूया प्यकुनय् प्यंगःथां व दथुइ लाक्क भाषा निभाः कसाःया अर्धकदया झ्वाता पलिस्था याःगु खः । थुपिं दक्वं झ्वाता मूर्तिकार महेश तुलाधरं दयेकादीगु खः ।

ज्याझ्लय् नवासें कांगे्रस नेतालिसें पुलांम्ह उपप्रधानमन्त्री सिंहं नेपालभाषा साहित्यया न्याम्ह अग्रजया झ्वाता पलिस्था यायेगु ज्यां राणाकालय् भाषा, साहित्यया उत्थानया निंतिं वय्कःपिंसं बियादीगु योगदान च्वछायेबहजू धासें थुकियात न्हू पुस्तां न्ह्याबलें नं लुमंकाच्वनी धयादिल ।

बागमति प्रदेशया मन्त्री मानन्धरं नेपालभाषा साहित्यया मुर्धन्य व्यक्तित्व प्यंगःथां व भाषा निभाःया झ्वाता येँ देय्या केन्द्रय् निर्माण यानाः तये खंगुलिं थःत गौरवया अनुभूति जूगु खँ कनादिल । लिसें वय्कलं भाषा, कला, साहित्यया ख्यलय् ज्वःमदुगु योगदान बियादीपिं महारथीपिनिगु जीवनी, योगदान व कृतित्वया बारे सीकेत सम्बन्धित थासय् तक वयेमाःगु बाध्यताया अन्त्य यासे क्यूआर कोड निर्माण यानाः जानकारी काये फइगु व्यवस्था यायेगु स्वयेमाः धासें उकिया निंतिं प्रदेश सरकारपाखें माःगु ग्वाहालि यायेगु प्रतिवद्धता नं प्वंकादिल ।

जनकवि श्रेष्ठं नेपालभाषा साहित्यया ख्यलय् थःगु जीवन पाना वंपिं महान् व्यक्तिया झ्वाता निर्माण यायेगु धइगु वृक्षारोपण यायेगु सरह जूगु धारणा तयादिसें लिपा वनाः भाषा, साहित्य व नेवाः जातिया उन्मुक्तिया फल सया वइगु विश्वास प्वंकादिल ।

येँ महानगरया निवर्तमान प्रमुख शाक्यं थःगु कार्यकालय् स्थानीय पाठ्यक्रम ‘येँ देय् म्हसीके’ लागू यानाः महानगरया दक्वं ब्वनेकुथिइ तगिं १ निसें ८ गू तक अनिवार्य अध्यापनया व्यवस्था यानागु जानकारी बियादिसें उकियात अझ व्यवस्थित व सशक्त याना यंकेमाःगु खँय् बः बियादिल ।

पाठ्यक्रम निर्माणं नेपालभाषा संरक्षण यायेत ग्वाहालि जुइगु नापं येँ देय्या भाषा, कला, साहित्य, सभ्यता, संस्कृति, इतिहासयात थुइके फइगु विश्वास प्वंकादिसें थीथी ख्यलय् योगदान बियादीपिं व्यक्तित्व व कृतित्वयात म्हसीकेगु उद्देश्यं पाठ्यक्रम निर्माण यायेगु ज्या जूगु जानकारी बियादिल ।

२५ वडाया निवर्तमान वडाअध्यक्ष शाक्यया सभापतित्वय् न्ह्याःगु ज्याझ्वलय् वय्कलं हे लसकुस यानादीगु खःसा जनबहाःया गुरुजुपिंसं स्वस्ति वाचन यानादीगु खः ।

बागमति प्रदेश सरकार व येँ महानगरपालिकाया आर्थिक ग्वाहालिइ कुल २१ लाख लागतय् उगु झ्वाता निर्माण यानाः पलिस्था याःगु खः ।