परियत्तिइ ताःलाःपिंत हनेज्या
येँ – अखिल नेपाल भिक्षु महासंघपाखें न्ह्यानाच्वंगु नेपाल बौद्ध परियत्ति शिक्षा बु.सं. २५६२ या परियत्ति परिक्षाय् ख्वपया मैत्रेय परियत्ति केन्द्रपाखें सहभागी परिक्षार्थीपिं मध्ये न्हाप, लिउ व लियांलिउ जूपिंत दसिपौ व सिरपाः बियाः हनेज्या याःगु दु ।
भिक्षु निग्रोध महास्थविरया मुपाहाँसुइ पञ्चशील ग्रहण यासें न्ह्याःगु ज्याझ्वलय् लसकुस यासें संघया सचिव संचित बुद्धाचार्यंं विद्यार्थीपिंके नैतिक चेतना व शिष्टाचार ब्वलनीगु जूगुलिं परियत्ति शिक्षा ख्वपया थीथी स्कूलय् लोकप्रिय जुया वःगु व मैत्रेय युवा संघं थुकियात प्रोत्साहन बिया वयाच्वंगु खँ कनादिल ।
संघया उपाध्यक्ष लक्ष्मीचन्द्र बज्राचार्यया सभापतित्वय् जूगु ज्याझ्वलय् मैत्रेय परियत्ति केन्द्रया अध्यक्ष तिर्थराज बज्राचार्यंं स्थानीय पाठ्यक्रमय् ख्वपया पञ्चदान व सम्यकदान सम्बन्धी सामग्री दुथ्याइगु जूगुलिं लसता प्वंकुसे भविष्यय् परियत्ति पाठ्यक्रम नं दुथ्याइगु आशा प्वंकादिल ।
अथेहे वय्कलं ख्वप लागाया झौखेलय् वयाच्वंगु बौद्ध जागरणयात मैत्रेय युवा संघंं हःपा बियाच्वनेगु प्रतिबद्धता नं प्वंकादिल । ज्याझ्वलय् मैत्रेय युवा संघया परियत्ति ब्वनामिपिं अनु शाक्य, अमिताभ दोङ्गपिंसं परियत्ति शिक्षा ब्वनाः थःगु जीवनय् बांलाःगु हिउपाः वःगु बिचाः प्वंकादिल ।
मुनिबिहार परियत्ति केन्द्रया प्रतिनिधि बिद्या शाक्य कोविद व कल्याण मित्र अर्जुन प्रजापतिं नं थःथःगु नुगः खँ प्वंकादीगु ज्याझ्वलय् रत्नायन परिवारपाखें दाता दानशोभा शाक्यं परियत्ति ताःलाःपिंत नगद पुरस्कार नं बियादीगु खः ।
अथे हे २५६३ औं बुद्धजयन्तिया लसताय् मैत्रेय युवा संघया ग्वसालय् जूगु बौद्ध बालचित्रकला प्रतियोगिताय् न्हाप, लिउ, लियांलिउ व हःपाः पुरस्कार त्याकूपिं बाल कलाकारपिनिगु नां न्यंकूगु खः । परियत्तिइ ताःलापिं व बालचित्रकला प्रतियोगिताय् त्याकुपिं सकसितं मूपाहाँं श्रद्धेय भन्ते निग्रोध महास्थविरं पुरस्कार लःल्हानाबिज्यासें परियत्ति विद्यार्थीपिंत ‘ए’ फर एटिच्युद ‘बि’ फर बिहेबियर, ‘सी’ फर क्यारेक्टर धैगु निर्देशन बिसें उत्साहित यानाबिज्यात ।
LEAVE YOUR COMMENTS