यलय् आकाशे ताँ दयेकेत सम्भाव्यता अध्ययन

येँ (नेपालभाषा टाइम्स) – यल महानगरपालिकाया थीथी थासय् आकाशे ताँ निर्माणया निंतिं अध्ययन शुरु जूगु दु। यल मनपाया थीथी न्यागू थासय् आकाशे ताँ निर्माण यायेत सम्भाव्यता अध्ययन याःगु खः ।

ग्रीड इन्डिको मटेरियल टेस्ट जेभी आकाशे ताँया निंतिं अध्ययन यायेत्यंगु खः । यल महानगरपालिकाया कथं पूच्वनिसें कुपण्डोल बागमति ताँ वनेगु लँ, ग्वार्को, सातदोबाटो, लुँभु दोबाटो व एकान्तकुनाय् दयेकेत्यंगु आकाशे ताँया सम्भावता अध्ययनया मस्यौदायात कयाः सहलह शुरु जूगु दु ।

यल मनपाया प्रमुख चिरिबाबु महर्जनं चक्रपथ लागाया प्यंगू थासय् व बागमति ताँतक आकाशे ताँ (फ्लाइ ओभर) निर्माणया निंतिं ग्रीड जेभीयात जिम्मा बियागु जानकारी बियादिसें महानगरपालिका दुने फ्लाइ ओभर निर्माण जुइगु गौरवया खँ जूगु धयादीगु दु ।

सम्भाव्यता अध्ययन याना च्वंगु ग्रीड जेभीपाखें सम्भाव्यता अध्ययन प्रतिवेदन वयेवं सडक विभागलिसे सहलह यानाः याकनं निर्माणया ज्या न्ह्याकेगु यल मनपां न्ह्यथंगु दु ।

यल मनपाया प्रवक्ता राजु महर्जनं आकाशे ताँया निर्माण लिपा सतक दुर्घटनाय् म्होति वइगु नापं अस्तव्यस्त जुयाच्वंगु ट्राफिक व्यवस्थापन नं सहज जुइगु विश्वास प्वंकादीगु दु ।

यल मनपां आकाशे ताँ निर्माणया निंतिं गाइडलाइनतकं तयार याःगु दु ।

सम्बन्धित बुखँ

LEAVE YOUR COMMENTS