त्यंघलय् धः म्हूथाय् पुलांगु ल्वहंहिति लुया वल

येँ (नेपालभाषा टाइम्स)÷थनया त्यंघः त्वालय् न्हूगु धः तयेगु लागिं सतकय् गाः म्हूबलय् ल्वहंहिति लुया वःगु दु । त्यंघलय् आशा सफूकुथि वनेगु लँय् गाः म्हूबलय् उगु हितिया छधाः लुया वःगु खः ।

ज्यामितय्सं गाः म्हुयाच्वंगु इलय् ल्वहं हितिया धाः लुया वयेवं स्थानीय मनूत अजूचाःगु दु । तर थ्व हिति अन गनं वल धइगु खँ धाःसा सुना नं धाये मफुनि । थ्व अन हे दुगु हितिया अवशेष खः वा मेथासं हयाः अन ल्हाकातःगु हिति धाः खः धाये मफुनिगु खँ स्थानीय भाषासेवी धनबहादुर महर्जन ‘तिमिलां’ ‘नेपालभाषा टाइम्स’ यात कनादिल ।

वय्कःया कथं न्हापा अन त्यंघः हिति नं दु धाइगु खः, तर उगु हिति गन दु धइगु खँ धाःसा सुनां मसिउ । थ्व वहे त्यंघः हितिया अवशेष खः ला धकाः नं अनुमान जुयाच्वंगु दु ।
वय्कलं कनादीकथं आः हिति लुया वःगु थासय् न्हापा स्थानीय मनू–तय्सं छेँ दनेत गाः म्हूबलय् नं पुलांगु ततःपागु अप्पा लुया वःगु खः । उकिं उगु थासय् छुं कथंया पुलांगु संरचना दयेमाः धकाः अनुमान यायेछिं ।

आः लुया वःगु हितियात त्वालय् तुं सुरक्षित याना तयेगु लागिं स्थानीय मनूतलिसे सहलह जुयाच्वंगु खँ नं वय्कलं कनादिल । आःयात हिति सुरक्षित याना तःगु दुसा लिपा सकस्यां खने दइकथं गनं तये माली धकाः खँ जुयाच्वंगु सीदुगु दु ।

 

 

सम्बन्धित बुखँ

LEAVE YOUR COMMENTS