सुख्खा बन्दरगाह हानं शिलान्यास !

स्थानीय जनताया विरोध दुसां दयेकेगु तयारी

येँ – स्थानीय जनताया विरोध दयेक दयेकं नं सरकारं चोभारय् आधुनिक सुख्खा बन्दरगाह दयेकेगु ज्या न्ह्यःने न्ह्याकेगु तयारी यानाच्वंगु खँ सीदुगु दु । थ्वहे वइगु बिहीवाः प्रधानमन्त्री केपी शर्मा ओलीं उगु बन्दरगाहया शिलान्यास यायेगु तयारी जुयाच्वंगु दु ।नेपाल इन्टर मोडेल यातायात विकास समितिया कार्यकारी निर्देशक रविशंकर सैजुं बन्दरगाह निर्माणया ठेक्का बीगु प्रक्रिया पूवने धुंकूगु खँ कँसें याकनं हे बन्दरगाह दयेकेगु खँ कनादीगु दु ।

वंगु न्याला न्ह्यवंनिसें अन सुख्खा बन्दरगाह दयेकेगु तयारी जुयाच्वंगु खःसां स्थानीय जनताया विरोधया कारणं ज्या दिनाच्वंगु खः । स्थानीय जनतां हिमाल सिमेन्ट कारखानाया कारणं जूगु क्षतिया क्षतिपूर्ति बीमाःगु, कारखानाया जग्गा स्थानीय जनतायात लित बीमाःगु, कर्मचारीतय्सं काये ल्यं दनिगु पारिश्रमिक भुक्तानी यायेमाःगु माग याना वयाच्वंगु दु ।

स्थानीय जनतां चोभाःयात पर्यटकीय हबया रुपय् विकास यायेमाःगु खँ तयाच्वंगु दु । चोभारय् सुख्खा बन्दरगाह दयेकेबलय् स्वनिगलय् प्रदुषण अप्वइगु खँ धासें उगु लागाय् सुख्खा बन्दरगाह दयेकेगु ज्या यायेमजिउगु माग याना वयाच्वंगु दु । आयोजनाया कार्यकारी निर्देशक सैंजु धाःसा स्थानीय जनताया माग पूवंकाः आयोजना न्ह्याकेगु खँ कनादीगु दु ।

विश्व बैंकया ग्वाहालिं दयेकेत्यंगु थ्व आयोजनाया लागत १ अर्ब २८ करोड तका जुइ । समिति व निर्माण कम्पनी दथुइ सम्झौता जूकथं बन्दरगाह झिंच्यालाया दुने तयार जुइ । सरकारं चोभाःयात ट्रान्जित हबया रुपय् विकास यायेगु तयारी यानाच्वंगु दु । तराई–येँ स्वाइगु फास्ट ट्राय्क, वीरगञ्ज–येँ स्वाइगु रेलमार्ग व चीनया केरुङ जुयाः वइगु रेलमार्गयात नं चोभारय् हयेगु तयारी यानाच्वंगु दु ।

विश्व बैंकयात स्थानीयया विरोध

चोभारय् दयेकाच्वंगु सुख्खा बन्दरगाहया विरोधय् चोभार संरक्षण समितिं सोमवाः विश्व बैंकयात विरोध पौ लःल्हाःगु दु । संरक्षण समितिया अध्यक्ष पञ्चलाल महर्जनया नेतृत्वय् वंगु पुचलं उगु ज्ञापन पौ लःल्हाःगु खः । ज्ञापन पौ लःल्हाना कासें विश्व बैंकया नेपाः प्रतिनिधि दीपकमान सिं श्रेष्ठं तत्कालया निंतिं उकी लगानी मयायेगु खँ कनादीगु दु ।

प्रतिनिधि श्रेष्ठं स्थानीय वासिन्दा व सरकार दथुइ विवाद कायम जुयाच्वन धाःसा थःपिंसं लगानी मयायेगु खँ धाःगु खः । थुगु आयोजनाय् स्थानीय जनताया विरोध दुगु खँ थःपिंसं सिउ धासें न्हापांनिसें सरकारयात स्थानीय जनताया समस्या समाधान यायेत सुझाव बिया वयाच्वनागु खँ नं श्रेष्ठं कनादीगु दु ।

सम्बन्धित बुखँ

LEAVE YOUR COMMENTS