बेनीइ लाखेप्याखंया प्रदर्शन क्वचाल
येँ – म्याग्दीया बेनीइ वंगु लछि न्ह्यवंनिसें न्ह्यानाच्वंगु लाखे प्याखं क्वचाःगु दु । दँय्दसं नागपंचमिया न्हिनिसें यंलाथ्व तृतियातक बेनीया थीथी थासय् प्रदर्शन याना वयाच्वंगु थुगुसीया लाखे प्याखं औपचारिक रुपं क्वचाःगु खः ।थनिं निसःत्या दँ न्ह्यः ख्वपं वःपिं नेवाः समुदायं हे बेनीइ नेवाः संस्कृति दुत हःगु विश्वास यानातःगु दु ।
ख्वपं वःपिं नेवाःत बेनीइ वयाः च्वं वयेवं उगु इलंनिसें थन बर्खे प्याखंकथं लाखे प्याखं पिथनेगु याना वयाच्वंगु खः । नागपंचमिया न्हिकुन्हु पिदंगु लाखे प्याखं बेनीया थीथी थासय् प्रदर्शन यायेगु याना वयाच्वंगु दु । परापूर्वकालय् समाजय् दुःख बीगु, सामाजिक विकृति न्यंकूगु धासें गथांमुगःयात म्याग्दी व काली गण्डकीया दोभानय् यंकाः विसर्जन यायेवं थन लाखे प्याखं पिथनेगु शुरु जुइ ।
लछियंकं न्ह्याइगु लाखेप्याखनय् परम्परागत सांस्कृतिक व पौराणितक महत्वयात पिब्वयेगु कुतः कथं लाखे प्याखं पिथनेगु याना वयाच्वंगु दु । स्थानीय नेवाः समुदायं प्रदर्शन याना वयाच्वंगु लाखे प्याखं बेनीया दकलय् लोकंह्वाःगु सांस्कृतिक प्याखं नं खः ।
वंशावलीइ न्ह्यथनातःकथं लाखे प्याखं पिथनेगु प्रचलन जुजु गुणकामदेवं शुरु याःगु धयातःसां नं जुजु प्रताप मल्लया पालंनिसें ख्वाःपाः व मुकुट पुनाः लाखे प्याखं पिथनेगु याःगु धइगु खँ न्ह्यथनातःगु दु । बेनीइ लाखे प्याखं बाहेकं रोपाइ जात्रा (प्याखं), जोगी प्याखं, नागनागिनी प्याखंलिसें श्रीकृष्ण रथयात्रा नं याना वयाच्वंगु दु ।
LEAVE YOUR COMMENTS