टेकुया फोहर प्लाष्टिकं त्वपुना बिल

येँ(नेपालभाषा टाइम्स)÷येँ महानगर पालिकां टेकुया ट्रान्सफर स्टेशनय् च्वंगु फोहर प्लाष्टिकं त्वपूगु दु । महानगरं ट्रान्सफर स्टेशनय् च्वंगु छुं भाग फोहरय् जीवातु तयाः प्लाष्टिकं त्वपूगु खः ।

स्वनिगलय् उत्पादन जूगु फोहर संकलन यानाः टेकुया ट्रान्सफर स्टेशनय् तये यंकीगु खः । थ्व इलय् न्हियान्हिथं वा वयाच्वंगुलिं पूर्ण क्षमताया फोहर ल्याण्डफिल साइटय् व्यवस्थापन यायेत समस्या जुयाच्वंगु थुकिं यानाः स्टेशनय् च्वंगु फोहरं दृश्य प दुर्गन्ध अप्वइगु जुइवं न्हापां अन तयातःगु फोहरयात प्लाष्टिकं त्वपूगु खः ।
ट्रान्सफर स्टेशनय् च्वंगु फोहरय् जीवातु तयाः प्लाष्टिकं त्वपुइं थुकिं यानाः ट्रान्सफर स्टेशनं न्यना वनीगु दुर्गन्धया लिच्वः म्हो जुइगु खँ धाःगु दु । थौंकन्हय् सहरया थीथी थासं न्हिथं संकलन याना हःगु फोहर स्टेशनया छगू साइटय् तयाः ढुवानी याना वयाच्वंगु दु ।

वंगु छुं दिं न्ह्यःनिसें स्वनिगःया मौसम खराब जुयाच्वंगु व म्हिगः सुथं निसे निभाः त्वःगु मौका लाकाः उकथं फोहरयात प्लाष्टिकं त्वपुइगु नापं थप गाडी परिचालन यााः स्टेशनय् दुगु फोहरया मात्राय् म्होति हयेगु कुतः जुयाच्वंगु महानगरं न्ह्यथंगु दु ।

थ्व हे झ्वलय् येँ महानगरं टेकुस्थित ट्रान्सफर स्टेशनयात फोहर शुन्य यायेगु कुतः याना वयाच्वंगु दु । सवारी साधनया म्होति, ल्याण्डफिल साइटयात कयाः खने दयाच्वंगु प्राविधिक, सामाजिकलिसें मेमेगु समस्याया कारणं फोहर ढुवानी बांलाक जुइ मफयाच्वंगु अवस्थाय् ट्रान्सफर स्टेशनय् फोहर मुनाच्वनीगु जुयाच्वंगु दु । थुकथं ट्रान्सफर स्टेशनय् मुना च्वंगु फोहरं दुर्गन्ध न्यना वनीगु नापं मेमेगु समस्या नं जुइगुलिं उकियात चिइकेगु कुतः जुया वयाच्वंगु दु । ट्रान्सफर स्टेशनयात फोहर शुन्य यायेगु कुतःकथं हे अन च्वंगु फोहरय् जीवातु तयाः प्लाष्टिकं त्वपुइगु योजनाकथं उगु कुतः याःगु खः ।

थुकथं हे जैविक फोहरय् माइक्रो बायो पोजिटिभ जीवाणु (ब्याक्टेरिया) ल्वाक छ्यानाः दुर्गन्ध मवयेकेगु विधिया नं परीक्षण याःगु दु । निष्क्रिय यानातःगु जीवाणुयात सक्रिय यायेत थुकथंया विधि प्रयोग याइगु व थुगु विधिपाखें फोहरं दुर्गन्ध मवइगु नापं मानव स्वास्थ्यय् नं लिच्वः लाकीमखु धाःगु दु ।

सम्बन्धित बुखँ

LEAVE YOUR COMMENTS