ट्रान्सपरेन्सी इन्टरनेशनलपाखें पुनःनिर्माण सम्बन्धय् अन्तक्र्रिया

ख्वप – ट्रान्सपरेन्सी इन्टरनेशनल नेपाल च्याप्टरया ग्वसालय् पुनःनिर्माण सम्बन्धी छगू अन्तक्र्रियाव सार्वजनिक सुनुवाई ज्याझ्वः वंगु सोमवाः जुल । थनया लिबालिबिइ गणेद्यःया ख्यलय् भुखाय् लिपाया पुनःनिर्माणयात कयाः उगु अन्तक्र्रियाय जूगु खः ।ख्वप जिल्लाया सहायक प्रमुख जिल्ला अधिकारी जयकुमार घिमिरे समक्ष भुखाचंपीडित स्थानीयवासीतय्सं थःथःगु पीडायात न्यंकेगु ज्या जूगु खः । उगु इलय् सहायक प्रजिअ घिमिरें जनगुनासो न्यनेगु महत्वपूर्ण अवसर प्राप्त जूगु खँ न्ह्यथँसें लिक्कं वडा ज्याकू दुुगुलिं वडाय् हे वनाः थःगु खँ तयेत इनाप यानादिल ।

जिल्ला विकास समिति ख्वपया उपसभापति सरिता कुँवरं थःपिंसं सरकारं लागू यानातःगु नियमकथं पुनःनिर्माणया ज्या न्ह्याकूपिंत ग्वाहालि याना वयाच्वनागु जानकारी बियादीगु खः । अथे हे नेपाल बैंकया प्रतिनिधिनापं पुनःनिर्माण ज्याकूया प्रतिनिधि समिककुमरा ढकालं स्थानीयवासीया समस्यायात नियमित रुपं न्यनेगु नापं उकियात सुधार यायेगु ज्या जुयाच्वंगु स्पष्ट यानादिल । ८ वडाअध्यक्ष महेन्द्र खाय्मलीया सभापतित्वय् जूगु ज्याझ्वलय् यक्वसिनं थःथःपिंत जूगु पीडा न्यंकादीगु खः । थ्व स्वयां न्ह्यः नं थुकथंया हे अन्तक्र्रिया ज्याझ्वः न्ह्याके धुंकूगु संस्थां मेमेगु जिल्लाय् नं थुकथंया ज्याझ्वः न्ह्याकेगु योजना दुगु जानकारी बिउगु खः ।