नेपाः–चीन रेलवे हानं म्वाकीगु

चीनयात बीगु लागिं प्रतिवेदन तयार याकेगु शुरु
येँ – पुलांम्ह प्रधानमन्त्री शेरबहादुर देउवाया सरकारं थः सत्ताय् दत्तले ध्याकुनय् लाका तःगु नेपाः–चीन रेल मार्ग सम्बन्धी परियोजनायात वर्तमान ओली सरकारं हानं म्वाकीगु जूगु दु । चीनया केरुङ जुयाः येँ, पोखरा व लुम्बिनी तक वनी धयातःगु थ्व रेलवे सम्बन्धी परियोजनायात हानं म्वाकेगु लागिं यातायात मन्त्रालयया रेल विभागं तयारी शुरु याःगु खँ सीदुगु दु । वर्तमान प्रधानमन्त्री केपी ओलीया न्हापाया कार्यकालय् चीनलिसे पारवाहन तथा अन्तर्देशीय रेलवे सम्झौता जुइधुंकाः चीनं नेपाः तक रेल हयेगु तयारी शुरु याःगु खः ।

तर पूर्ववर्ती सरकारं थ्व परियोजनायात प्राथमिकताय् मतःगुलिं थ्व अथें थाति लानाच्वंगु खः । चीनया छगू पुचः नेपाः वयाः रेलवेया सम्भाव्यता अध्ययन समेत यायेधुंकूगु दुसा उगु पुचलं थ्व रेल नेपालय् हये फइगु रिपोर्ट बिउगु खः । रेल विभागं धाः कथं थ्व रेलवे निर्माण यायेगु बारे नेपाःपाखें चीनयात प्रतिवेदन बीत आवश्यक तयारी पूरा जुइधुंकूगु दु । तर थुकी लगानी सुनां याइगु व छु मोडलय् याइ धइगु खँ स्पष्ट मजूगुलिं प्रतिवेदनयात अन्तिम रुप धाःसा बी फयाच्वंगु मदुनि ।

अथे खःसां सूत्रतय्सं धाः कथं थ्व रेल हयेगु लागिं माःगु अधिकांश खर्च चीनं हे व्यहोरे यायेगु सहमति जुयाच्वंगु दु । थ्व रेलवे हयेत करिब ३ खर्ब तका दां खर्च जुइगु अनुमान यानातःगु दु । समुद्री सतहं ५ हजार फिट मिटर तक थहां वनाः अनं छक्वलं १५०० मिटरय् कुहां वयेमाःगु थाकुगु क्षेत्र थ्व रेलवेया लँय् लानाच्वंगु दु ।

भारतीय रेल लँय् भाः थहां वन
चीनया रेल नेपाः दुत हयेगु लागिं तयारी शुरु जुयाच्वंगु इलय् उखे भारतीय रेल धाःसा नेपाः हयेगु लागिं ज्या समेत शुरु जूगु दु । भारतया रक्सौल जुयाः थ्व रेल नेपाः हयेत्यंगु खः । भारतया रेल दुहां वइगु जुइवं थ्व रेलमार्गं थीथी नेपाःया सिरहा, सर्लाही, बारा आदि जिल्लाय् थौंकन्हय् जग्गाया भाः नं थहां वनेगु शुरु जूगु दु । भारतीय रेल वइगु खँ सार्वजनिक जुइवं उगु लागाय् जग्गा न्याइपिं प्रशस्त अप्वःगु खः । थुकिं यानाः जग्गाया भाः थी हे मफयेक थहां वंगु खँ स्थानीय मनूतय्सं धाःगु दु । चीनया रेल वये न्ह्यः हे भारतीय रेल दुत हयेगु लागिं अन तीव्र गतिं ज्या जुयाच्वंगु खँ नं धाःगु दु ।

सम्बन्धित बुखँ

LEAVE YOUR COMMENTS