बँपसः चीकेत मेयर साहं स्थानीय अभियन्तातय् मुँज्या सःतल
येँ (नेपालभाषा टाइम्स)- येँया बँपसः चीकेगु अभियानयात बँपसल्या लिसें छुं तःधंगु मिडियातय्सं विरोध यायेवं येँ मनपाया मेयर बालेन्द्र साहं स्थानीय जनताया साथ कायेगु पहल न्ह्याकादीगु दु ।
बँपसः चीकेगु लागिं येँ मनपां न्ह्याकूगु पलाःया विरोधय् खास यानाः पिनें वयाः च्वनाच्वंपिं मनूतय्सं विरोध याना हःगु खः । उमिसं बँपसल्यातय्त चीकेगु ज्यां यानाः गरिबयात येँय् ज्या यानाः नके मबिल धकाः सः तया हःगु खः । तर बँपसः चीकेगु मनपाया ज्यायात येँया थीथी खलः पुचः लिसें स्थानीय जनतां धाःसा खुले जुयाः समर्थन याना हःगु खः ।
येँय् छुं ई न्ह्यः तिनि राज्यं स्थानीय जनताया छेँ थुनाः सतक विस्तार याःगु खःसा अथे विस्तार जूगु सतकय् पिनें वःपिं मनूतय्सं बँपसः तयाः अतिक्रमण याःगु व थुकिं यानाः राजधानीइ फोहरया समस्या तच्वःगु खः धकाः नं स्थानीय जनतां धायेगु याना हयाच्वंगु दु ।
म्हिगः च्वंगु येँ मनपाया कार्यपालिकाया बैठकं नं येँय् बँपसः तयेकेगु नीति हे मदु धासें थुकिया चीकां तुं त्वःतेगु निर्णय याःगु खः ।
वयां लिपा मेयर साहं येँय् थीथी अभियान न्ह्याकाः सक्रिय जुयाच्वंपिं स्थानीय अभियन्तातय्त सःताः बँपसः चीकेगु ज्याय् ग्वाहालि यायेत इनाप यानादीगु खः । येँया थीथी मुद्दा ज्वनाः सक्रिय जुयाच्वंपिं अभियन्तातलिसे खँल्हाबल्हा यासें मेयर साहं मनपाया थ्व अभियानय् येँया सकलें जनतां साथ बीमाःगु खँ नं धयादीगु खः । आः मनपां बँपसः चीकेगु अभियानयात अझ तच्वः याइगु खँ धाःगु दु ।
स्वतन्त्र मेयरतय् थःथःगु हे दुःख
राजनीतिक दलतप्रति असन्तुष्ट जूपिं जनताया भोट कयाः देय्या थीथी नगरय् स्वतन्त्रं दंपिं उम्मेदवारत मेयर पदय् विजय ला जुया वल, तर कार्यपालिकाया बैठकय् धाःसा अज्याःपिं मेयर व मेपिं वडा अध्यक्षतय् दथुइ तनाव ब्वलनीगु क्रम धाःसा शुरु जूगु दु ।
म्हिगः च्वंगु येँ मनपाया बोर्ड बैठकय् फोहर व्यवस्थापन यायेगु ज्याय् मेयर बालेन्द्र साहं बांलाक ज्या मयाः धइगु खँय् वडा अध्यक्षतलिसे कचवं जुल ।
१२ वडाया अध्यक्ष बालकृष्ण डंगोलं बांलाक फोहर व्यवस्थापन मजूगु कारणं यानाः १२ वडाया टेकुइ न्हिंन्हिं हे फोहर द्वँचिनाच्वंगु व थ्व फोहर चीकेगु लागिं मेयरं माक्व गाडी छ्वया महः धकाः आलोचना यानादीगु खः । उकियात लिसः बिसें मेयर साहं थम्हं यानाच्वनागु बांलाःगु ज्याया लागिं सुभाय् मबिसे केवल आलोचना जक यानाच्वना धकाः कुंखिनादीगु खः ।
मेखे धरानया मेयर हर्क साम्पाङयात नं बजेट पारित याकेगु सवालय् वडा अध्यक्षतय्सं अवरोध पिकाःगु समाचारत पिहां वःगु दु ।
LEAVE YOUR COMMENTS