चिनियाँतय्सं दयेकाच्वंगु छेँ दुनाः कम्बोडियाय् झिंन्याम्ह सित

कम्बोडियाय् दयेकाच्वंगु न्हय्तँजाःगु छखाः छेँ दुनाः म्होतिं नं झिंन्याम्ह सीगु दुसा मेपिं नीप्यम्ह घाःपाः जूगु दु । छेँ दुनेवं उद्धारकर्तातय्सं भग्वनावशेष चिइकाः जीवित दुपिं मालेगु ज्या याःगु खः । तटीय नगर सिहानुकभिलय् च्वंगु थ्व भवनय् छगू चिनियाँ कम्पनीं दयेकाच्वंगु खः ।

छेँ क्वःदयेवं छेँथुवाः चिनियाँ निर्माण कम्पनीया प्रमुख व ठेकेदारसहित प्यम्हेसित प्रहरीं ज्वंगु दु । उगु छेँ दयेकाच्वंगु जग्गाया थुवाःयात नं प्रहरीं न्यनेकनेया निंतिं नियन्त्रणय् काःगु दु ।सीपिं मध्ये छुं मनूत कम्बोडियाली नागरिक जूगु खँ धाःगु दु । थ्व भवन दयेकेत द्वःछिम्हं मल्याक ज्यामित खटे जुयाच्वंगु खःसां भवन दुंबलय् धाःसा न्यय्म्ह ति ज्यामि भवनय् दुगु खँ स्थानीय प्रशासकं धाःगु दु ।

निर्माण ज्याय् खटे जुयाच्वंपिं छुं ज्यामितय्सं थःपिं उगु भवनय् हे च्वंच्वनागु खँ नं धाःगु दु ।भवन दुनेवं झिंनिघौ लिपा उद्धार याःम्ह छम्ह ज्यामिं समाचार संस्था एपीयात धाःगु दु, ‘दुने न्ह्यव भवन थर्के जुल, अले दुनेगु सुरु जुल । बिसिउँ हे वने मलायेकं घ्वार्रर दुनावल । जि व जिमि कलातं गहार फ्वनाच्वना, तर सुनां मताः ।

जिपिं ला थन हे ल्हानाः सी ला धयाथें जुइधुंकूगु ।’कम्बोडियाय् आःतक जूगु मध्ये थ्व दकलय् बांमलाःगु दुर्घटना जूगु खँ धाःगु दु । थ्व दुर्घटना लिपा सहानुकभिलय् दयेकाच्वंगु मेमेगु भवनया बारे नं न्ह्यसः ब्वलंगु दु । न्या लाइपिं च्वनीगु छगू सामान्य गां जुयाच्वंगु सिहानुकभिल छुं दँ न्ह्यवनिसें चिनियाँतय् निंतिं आकर्षक थाय् जुयाच्वंगु दु ।

सन् २००० निसें थन पर्यटन व्यवसाय तच्वया वःगु खः । वंगु स्वदँया दुने चिनियाँतय्सं होटल व क्यासिनों यानाः थ्व थाय्या स्वरुप हे हिलेधुंकूगु दु । थ्व दुर्घटना लिपा कम्बोडियाय् चिनियाँ विरोधी भावना अझ तच्वइगु आशंका यानाहःगु दु ।