बुद्धया मूर्ति तोडफोडया घटनायात कयाः धर्मोदयया विरोध ज्याझ्वः, गृहमन्त्रीयात ज्ञापन पौ

येँ –  धर्मोदय सभां वंगु छुं दिं न्ह्यः लुम्बिनीया रुपन्देही जिल्ला अन्तर्गत सिद्धार्थ राजमार्गय् तिलोत्तमा नगरपालिकां थापना यानातःगु बुद्ध मूर्तिमध्ये शंकर नगरनिसें नयाँ मिलतकया लँपुइ लाःगु डिभाइडरय् तयातःगु न्याम्ह बुद्धया मूर्ति तोडफोड याना बिउगु घटनायात कयाः वंगु शनिवाः विरोधया ज्याझ्वः याःगु दु ।

धर्मोदयया अध्यक्ष यज्ञमानपति वज्राचार्यया सभापतित्वय् जूगु विरोध ज्याझ्वलय् महासचिव सागरमान वज्राचार्यं विरोध ज्याझ्वःया उद्देश्यया बारे कनादीगु खः ।

वय्कलं लुम्बिनी थेंज्याःगु पवित्र क्षेत्रय् बुद्धया मूर्ति तोडफोड जुइगु धइगु तसकं निन्दनीय ज्या खः धासें २०७६यात प्रदेश सरकारं लुम्बिनी भ्रमण वर्ष घोषणा यानाः व हे कथं थीथी ज्याझ्वः न्ह्याका वयाच्वंगु इलय् बुद्ध जन्मभूमि पवित्र लुम्बिनीइ हे उकथं बुद्धमूर्ति तोडफोडया घटना जुइगु धइगु गनं प्रदेश सरकारया घोषणायात हाथ्या बीगु ज्या जकं मखुला धकाः न्ह्यसः तयादिल ।

‘बौद्धतय्सं प्रदेश नं. ५यात ‘लुम्बिनी प्रदेश’ नामाकरण यायेमाःगु चाहना याना वयाच्वंगु विषययात क्वत्यलेगु ल्याखं नं थज्याःगु निन्दनीय ज्या जूगु खयेमाः’ वय्कलं धयादिल । वंगु साउन २ गते जूगु घटना थौं झण्डै बाःछि दयेकाः नं दोषीयात मज्वंगु खँय् वय्कलं दुःख प्वंकुसे याकनं दोषीयात ज्वनाः कडा सजाय बीत नं माग यानादिल ।

नेपाल बौद्ध महासंघया महासचिव गुरु कमल भण्डारीं बौद्धतय् क्रियाकलापयात न्ह्याबलें थुकथं हे दमन याना वयाच्वंगु खँ लुमंकादिसें दक्वं बौद्ध समूह जानाः फक्व याकनं छगू विरोध सभा यानाः सरकारी निकाययात ज्ञापन पत्र लः ल्हायेमाःगु आवश्यक जूगु धयादिल ।

आदिवासी जनजाति महासंघया उपाध्यक्ष गोविन्द छन्त्यालं निसःत्या दँया राजनीतिक इतिहासय् छगू हे जक भाषा, जाति व धर्मयात संरक्षण यानाच्वंपिं नश्लवादय् स्थापित शासकवर्गया हिउपाः वयेमाः धासें बुद्धमूर्ति तोडफोड जूगु घटनाय् सम्बन्धित निकायं माफी फ्वनेमाः धयादिल ।

ज्याझ्वलय् तमु बौद्ध सेवा समितिया अध्यक्ष ध्रुवबहादुर तमु, नेपाल मगर संघया अध्यक्ष बमबहादुर मगर, नेपाल शेर्पा समाजया महासचिव ङवाङ सोनाम शेर्पा, लोट्स रिसर्च सेन्टरया नायः डा. सुरेन्द्रमान वज्राचार्य, मैत्रेय युवा संघया सल्लाहकार तीर्थराज वज्राचार्य, युवा बौद्ध संघया पुलांम्ह नायः शान्तरत्न शाक्य, थःथःगु धारणा तयादीगु खः ।

अथे हे थेरवाद बौद्ध दायक परिषद्या अध्यक्ष बखतबहादुर चित्रकार, रामेश्वर श्रेष्ठ, किरणनर्सिंह शाक्य, गम्भिर वज्राचार्य, पुष्पबहादुर गुरुङ लगायतं लुम्बिनी, बौद्ध जगतय् वयाच्वंगु थुकथंया हाथ्यायात कयाः थःथःगु विचाः प्वंकादीगु खः ।थ्व हे झ्वलय् धर्मोदय सभाया अध्यक्ष यज्ञमानपति वज्राचार्यया नेतृत्वय् वंगु छगू प्रतिनिधिमण्डलं गृहमन्त्री रामबहादुर थापा बादलयात नाप लानाः ज्ञापन पौ लःल्हाःगु दु ।

लुम्बिनीया सिद्धार्थनगर सतकखण्डय् तयातःगु न्यागू बुद्धमूर्ति तोडफोड याःगु विरोधय् दोषीयात तत्काल ज्वनाः कडा कारवाही यायेत माग यासें उगु ज्ञापन पौ लःल्हाःगु खः ।उगु इलय् अध्यक्ष वज्राचार्यं ज्ञापन पौ ब्वनाः न्यंकादीगु खःसा महासचिव सागरमान वज्राचार्यं घटनाया विस्तृत जानकारी बियादिसें समग्र बौद्धतय् भावनायात थुइका बीत इनाप यानादिल । गृहमन्त्री थापां घटनायात कयाः दुःख प्वंकादिसें दोषी याकनं पत्ता लगे यानाः कडा कारवाही यायेगु आश्वासन बियादिल ।

सम्बन्धित बुखँ

LEAVE YOUR COMMENTS