अन्ततः बाघ भैरव देगलय् सिजःपौ हे तइगु जुल
किपू – थनया नांजाःगु बाघ भैरव देगलय् अन्ततः सिजःया हे पौ तइगु जूगु दु । उगु देगःया दथु तल्लाय् सिजःया पौ तयेगु धकाः थौंकन्हय् जुयाच्वंगु कुतःया विरोधय् लाःगु छगू रिटय् वहस यासें म्हिगः पुनरावेदन अदालतं अन सिजःया पौ तःसां जिउ धकाः फैसला न्यंकूगु खः ।
स्वतःजाःगु बाघ भैरव देगःया दकलय् च्वय्या तल्लाय् लीया पौ लानाच्वंगु दुसा वयां क्वय्या निगू तल्लाय् आँय्पा पौ तयातःगु दु । आः थुकिया दथुया तल्लाय् आँय्पा पौ लियाः सिजःया पौ तयेगु धकाः तयारी जुयाच्वंगु खः । तर स्थानीय मनूतय्सं देगःया आँय्पा पौ लिकयाः सिजःया पौ तयेबलय् उकिया मौलिक स्वरुप स्यनी धकाः विरोध याःगुलिं थ्व ज्या दिनाच्वंगु खःसा उकिया विरोधय् मुद्दा समेत लाःगु खः ।
म्हिगः पुनरावेदन अदालतया न्यायाधीशपिं किरण कुमार पोखरेल व नलिश्वर भण्डारीया इजलाशं अन आँय्पा पौ लिकयाः सिजःया पौ तयेगु फैसला न्यंकूगु खः । थ्व प्रकरणय् अधिवक्ता पुण्यप्रसाद खतिवडां किपू नगरपालिका, अनया सांसद राजन केसी, वडा कार्यालय व पुरातत्व विभागयात विपक्षी दयेकाः मुद्दा तःगु खः ।
उगु भेगया सांसद राजन केसीं थःगु सांसद कोषया ध्यबां ७० लाख तका खर्च यानाः बाघ भैरव देगलय् सिजःपौ तयेगु योजना दयेकूगु खः । थुकिया लागिं देगःया दथु तल्लाय् आँय्पा लीगु ज्या समेत न्ह्यायेधुंकूगु दु । तर सम्पदाप्रेमि स्थानीय मनूतय्सं आँय्पा पौ लिकाये मजिउ धाःगुलिं ज्या दिउगु खः । आः पुनरावेदनया फैसला लिपा अन आँय्पा पौ लिकयाः सिजः पौ तयेगु ज्या न्ह्याइगु खँ धाःगु दु ।
LEAVE YOUR COMMENTS