मलेशिया वनेमाःपिं झिद्वः नेपाःमि थानाच्वन

येँ – नेपाःया श्रमिकतय्के थीथी शीर्षकय् थप रुपं कायेगु यानाच्वंगु शुल्क मिनाहा मयाःतले नेपाःया ज्यामित मलेशिया मछ्वयेगु सरकारी अडानं यानाः उखे वनेगु तयारी यानाच्वंपिं १० द्वः नेपाली श्रमिकत नेपालय् हे थानाच्वंगु दु । मलेशियां भिसा, सुरक्षा लगायत थीथी शीर्षक तयाः श्रमिकतय्के अप्वः शुल्क कायेगु यानाच्वंगु खःसा नेपालं अज्याःगु शुल्क हटे याये माल धकाः मलेशिया सरकारयात इनाप याःगु खःसां मलेशियां धाःसा उकियात कयाः छुं लिसः बिउगु मदुनि । नेपाःया इनापयात मलेशियां वास्ता मयाःगुलिं वंगु स्ववाः न्ह्यः नेपालं मलेशियाय् श्रमिक छ्वयेगु हे बन्द याना बिउगु खः ।

नेपाःया थ्व अडानं यानाः मलेशिया वनेत ठिक्क जुयाच्वंपिं झिद्वः श्रमिकत नेपालय् हे थानाच्वंगु दु । नेपाः सरकारं धाःसा ज्या याः वने मखनाः आः भचा समस्या जूसां लिपा थःत हे फाइदा जुइगु जूगुलिं मलेशियालिसे जुयाच्वंगु कुटनीतिक पहल जारी हे याना तयेगु खँ धाःगु दु । थौंकन्हय् नेपाः मलेशियाया लिसः पियाच्वंगु दु ।

न्हापा न्हिं न्यासःनिसें खुसःम्ह तक मनूत मलेशिया वनेगु लागिं थनया मलेशिया राजदूतावासय् श्रम अनुमति पत्र समेत तयाः भिसाया लागिं वइगु खःसा थौंकन्हय् अथे वइपिनि ल्याः शुन्य जुयाच्वंगु दु ।

नेपाःया ज्यामित मलेशिया वनेगु ठप्प जूगुलिं थ्वलिसे सम्बन्धित मेमेगु व्यवसायत गथे कि हवाई टिकट, होटल, ट्राभल एजेन्सी, बीमा आदि थेंज्याःगु ज्या नापं प्रभावित जुया वःगु दु । मलेशिया नेपाःया ज्यामित दकलय् अप्वः वनीगु देय्त मध्ये छगू लाः । नेपाःया कूल ज्यामि मध्ये ३१ प्रतिशत मलेशिया वनीगु खँ श्रम विभागं
धाःगु दु ।

सम्बन्धित बुखँ

LEAVE YOUR COMMENTS