शनिवाः उदाय समाजया गुंला बाजं ब्वज्या

येँ (नेपालभाषा टाइम्स)- उदाय समाजया उदाय म्युजियमया ग्वसालय् निक्वःगु गुंला बाजं ब्वज्या जुइगु दु । वइगु शनिवाः कायाअष्टमि कुन्हु बसन्तपूया दशअवतार दबुलिइ थ्व ब्वज्या जुइत्यंगु खः । ब्वज्याय् उदाय समाजया खुगू खलकं ब्वति काइगु जूगु दु ।

बुधवाः छगू पत्रकार सम्मेलन यासें ब्वज्याय् उदाय समाज दुनेया खुगू खलः असं बाजं गुथि, जनबहाः गुंला बाजं, कसाः तःधं गुथि, ङत तुलाधर गुंलाबाजं खलः, तेबहाः गुंलाबाजं खलः, तवः गुंला बाजं खलः व स्थापित खलकं ब्वति काइगु जानकारी बिउगु खः ।

पत्रकार सम्मेलनय् न्ववासें ज्याझ्वःया कजि डा. सुमन कमल तुलाधरं ल्याय्म्हतय्त झीगु संस्कृति सम्पदापाखे जागरुक यायेगु, उत्साह अप्वयेकेगु ताः तयाः थ्व ज्याझ्वः यायेत्यनागु खँ कनादिल । आःयात उदाय समाजलिसे आवद्ध खलःपाखें जक ब्वज्या याइगु जूसां लिपा नेवाः समाजया मेमेगु जातिय खलःत लिसे जानाः नं तःजिक बाजं ब्वज्या यायेगु कुतः उदाय समाजं यानाच्वंगु खँ नं वय्कलं धयादीगु दु । अथेहे वय्कलं थ्व पालय् थीथी बाजं खलःपाखे मिस्तय् पुचलं जक बाजं थानाः नं ब्वज्या याइगु खँ नं धयादीगु दु ।

समाजया अध्यक्ष रुपज्योति कसाः नं थुगुसीया ब्वज्याय् निसः व पीम्हेसिनं बाजं थाइगु खँ न्ह्यथनादिसें सकसितं ज्याझ्वलय् ब्वति कायेत आह्वान यानादीगु दु ।