कोरोना अपटेड : सीपिं स्वम्हेसित संक्रमणया आशंका

येँ – कोरोना संक्रमित धकाः आशंका यानातःपिं स्वम्ह मनू सीवं उमिगु मृत्युया कारण मालेत सरकारं परीक्षण शुरु याःगु दु ।

स्वास्थ्य मन्त्रालयं बिउगु जानकारी कथं येँया वीर अस्पतालय् सीपिं निम्ह व यलया पाटन अस्पतालय् सीम्ह छम्ह समेत यानाः स्वम्हेसिया मृत्युया कारण जाँच जुयाच्वंगु दु । तर लिच्वः धाःसा पिहां मवःनि ।

वीर अस्पतालय् सीपिं निम्ह मध्ये छम्ह सुगर व ब्लडप्रेसरया विरामी खः । तर सीबलय् वयाके ‘फिभर’ नं खने दुगु जुयाच्वन । अथे हे मेम्ह छम्ह भारतीय नागरिक खः । वयात नं ज्वरो वयाः हे अस्पतालय् भर्ना याःगु खः । उकथं हे पाटन अस्पतालय् नं थौं सीम्ह छम्ह मनूया जाँच जूगु दु, रिपोर्ट मवःनि ।

थौंकन्हय् येँया टेकू अस्पतालय् कोरोना संक्रमणया आशंकाय् प्यम्हेसित आइसोलेसनय् तयातःगु दुसा पाटन अस्पतालय् स्वम्हेसित तयातःगु दु । पाटनय् थौं सीम्ह मनू कोरोना संक्रमित धकाः पिने हल्ला जूसां पाटन अस्पताल सूत्रं धाःसा उकिया खण्डन याःगु दु । अन आइसोलेसनय्त यातःपिं न्याम्ह मनूत म्हिगः तिनि रिपोर्ट नेगेटिभ वयेवं डिस्चार्ज जूगु खँ नं अस्पताल सूत्रं धाःगु दु ।

स्वास्थ्य मन्त्रालयं धाः कथं आः सरकारं कोरोना परीक्षणया दायरा अप्वयेका यंकूगु दु । थौं जक सरकारं न्हूपिं ७६ म्ह मनूयात परीक्षण याःगु दुसा आः तक मुक्कं ९९३ म्हेसित परीक्षण यायेधुंकूगु दु ।

(ने. सं. ११४० चौलाथ्व ६/ वि. सं २०७६ चैत १७, साेमवाः)