चोलेन्द्रविरुद्ध प्रमाण मुन

येँ (नेपालभाषा टाइम्स)- पुलांम्ह प्रधानन्यायाधीश चोलेन्द्र शम्शेर जबरा विरुद्ध महाअभियोगया प्रमाणया निंतिं पुलांपिं न्यायाधीश फोरमं प्यंगू बुँदे पौ महाअभियोग सिफारिस समितियात बुझे याःगु दु । पुलांपिं न्यायाधीशतय्सं रञ्जनप्रसाद कोइरालाया मुद्दाया बारे सर्वोच्च अदालतं मिसिल झिके यानाः छानविन यायेमाःगु माग याःगु दु ।

उकथं हे थःपिंसं निदँ न्ह्यः जारी यानागु विज्ञप्तियात नं आधार दयेकेत सुझाव बिउगु दु । अथे हे सुझावय् थःपिंसं २०७८ साल कार्तिक ५ गते न्यायपालिकाया बेथिति, विकृति व विसंगति बारे विज्ञप्तिपाखें सरोकार तयागु धासें उकियात अध्ययन यायेत नं सुझाव बिउगु दुसा सर्वोच्च अदालतया भवन दयेकेगु झ्वलय् जूगु अनियमितताय् विज्ञप्तिपाखें छानविन यायेमाःगु खँ नं धयातःगु दु ।

न्यायाधीशया आचार संहिता अःखः निलम्बित प्रधानन्यायाधीश जबरां वंगु दँय् टेलिभिजनय् अन्तर्वार्ता बिउगु धासें उकियात नं प्रमाणया रुपय् कायेत व छानविन यायेत माग याःगु दु । उकथं हे पुलांपिं न्यायाधीशतय्सं थप जानकारी माल धाःसा थःपिं उपलब्ध जुइगु खँ नं धाःगु दु ।