रियायात देपुजा गुथिपाखें हना

येँ- एशोसियसन अफ चार्टर्ड सर्टिफाइड एकाउन्टेन्ट (एसीसीए)या परीक्षाय् विश्वया हे सर्वोत्कृष्ट विद्यार्थी जुइत ताःलाःम्ह रिया मानन्धरयात साहु खलः देपुजा गुथिपाखें हनेज्या याःगु दु । वंगु शनिवाः देपुजा गुथिया थःगु भवन बुरांख्यलय् जूगु छगू ज्याझ्वःया दथुइ ज्याझ्वलय् उपस्थिति जुयादीपिंमध्ये दकलय् थकालिम्ह शान्तकृष्ण मानन्धरं खादा क्वखायेकाः हनापौ देछानादीगु खः ।
अथे हे ज्याझ्वःया सभापति दिपक मानन्धरं स्वांमाः क्वखायेकाः तारा द्यःया मूर्ति लःल्हानादीगु खः ।

गुथिया दुजः अमृत मानन्धरं लसकुस यानादीगु ज्याझ्वः गुथिया जः शैलेन्द्र मानन्धरं न्ह्याकादीगु खःसा रिया मानन्धरया म्हसीका नं न्ह्यब्वयादीगु खः । ज्याझ्वलय् सम्मानित व्यक्तित्व मानन्धरं झिंस्वंगू पत्रया परीक्षा खःसां आतक थम्हं प्यंगू पत्र पूवंकेधुंगु व ल्यं दुगु गुंगू पत्रया निंतिं उतिकं मेहनत यानाच्वनागु खँ कनादीगु खः ।

थगुने डिसेम्बरय् एसीसीएं काःगु कर प्रणालीया परीक्षाय् विश्वन्यंकंया झिंस्वद्वः विद्यार्थीयात लिउने लाकाः विश्वया हे सर्वोत्कृष्ट विद्यार्थी जुइत ताःलाःगु खः । विश्वया १८० गू देशं स्वीकार यानातःगु एसीसीएया परीक्षाय् ख्वीप्यसःम्ह विद्यार्थी उत्तीर्ण जूगु खःसा सर्वोत्कृष्ट जुइत ताःलाःम्ह रियां २०० पाउण्ड सिरपाःलिसें एसीसीएपाखें दसिपौ नं प्राप्त यानादीगु खः ।

ज्याझ्वलय् बिउगु जानकारीकथं एसीसीएया स्वंगू लेभलय परीक्षा संचालन जुइ ।

सम्बन्धित बुखँ

LEAVE YOUR COMMENTS