सीपी मैनालीया जुजु महेन्द्र प्रेम

येँ – वामपन्थी नेता लिसें नेकपा (माले) या महासचिव सीपी मैनालीं म्हिगः जूगु राप्रपाया अधिवेशनय् शाह जुजु महेन्द्र व पृथ्वीनारायण शाहया थुलि व्यापक तारिफ यानादिल कि वय्कःया भाषण न्यनेधुंकाः माओवादी अध्यक्ष पुष्पकमल दाहालं न्ह्यसः हे तयादिल— कमरेड सीपी मैनालीं राप्रपाया अध्यक्ष जुइगु तयारी जकं यानादीगु खः लाकि ? यदि खःसा वय्कःयात अग्रिम भिंतुना ।

छगू इलय् राजतन्त्रया विरुद्ध बन्दुक ल्ह्वनाः विद्रोह यानादीम्ह मैनालीं म्हिगः राप्रपाया सभाय् न्ववासें जुजु महेन्द्रं नेपालय् विदेशी हस्तक्षेपयात पनेगु लागिं यक्व कुतः यानादीगु दु धासें वय्कः देय्या धाथेंयाम्ह राष्ट्रवादी नेता खः धयादिल ।

पृथ्वीनारायण शाहं ७० दँ तक मेहनत यानाः दयेकूगु नेपाःयात विदेशी हस्तक्षेपपाखें मुक्त यायेगु ज्या सुनानं याःगु दुसा व जुजु महेन्द्रं जक याःगु दु धासें वय्कःयात सम्मान यायेमाःगु बिचाः नं तयादिल । लिसें वय्कलं नेपालय् आः तक गुलि नं राजनीतिक परिवर्तन जुल व फुक्क विदेशी हस्तक्षेपं यानाः जक सफल जूगु धासें नेपाःमि जनतां थुकिया उच्च मूल्यांकन यायेमाःगु खँ बिचाः नं तयादिल ।

नेता सीपी मैनालीया थ्व महेन्द्रवाद खनाः अजूचाःम्ह माओवादी नेता दाहालं उगु हे सभां भाजु मैनालीं राप्रपाया अध्यक्ष हे जुइगु तयारी यानादीगु खः लाकि धासें उकिया लागिं अग्रिम भिंतुना समेत बियादीगु खः ।