कार्तिक १३ गते बिदा बीगु बचं

येँ – प्रधान–मन्त्री केपी शर्मा ओलीं थ्वहे वइगु कार्तिक १३ गते कुन्हु नं किजापुजाया लागिं सार्वजनिक बिदा बीगु खँ कनादीगु दु । म्हिगः थःथाय् वःगु नेकपा येँ जिल्लाया जनप्रतिनिधिपिनि प्रतिनिधि मण्डललिसे खँ ल्हासें वय्कलं कार्तिक १३ गते नं किजापुजा यायेमाःपिनि लागिं मन्त्रिपरिषद्पाखें निर्णय यासें सार्वजनिक बिदा बीगु खँ कनादीगु खः ।

येँया संघीय सांसद कृष्णगोपाल श्रेष्ठया नेतृत्वय् वंगु प्रतिनिधि मण्डलं प्रम ओलीयात थुगुसी तिथि विवादं यानाः कार्तिक १२ व १३ गते निन्हुं हे किजापुजा न्यायेकेमाःपिं पिहां वःगु जुयाः १३ गते कुन्हु नं सार्वजनिक बिदा बीमाःगु माग न्ह्यथनादीगु खः ।

वय्कःपिनि खँ न्यनेधुंकाःलि प्रम ओलीं सुयां नं संस्कृतियात प्रतिकुल लिच्वः लाकेगु सरकारया नीति मखु, सकसितं थःथःगु संस्कृति व संस्कार हनेगु समान अधिकार दु धासें कार्तिक १३ गते नं बिदाया लागिं विधिवत् निर्णय याकेगु बचं बियादीगु खः । पात्रोय् १२ गते जक बिदाया व्यवस्था यानातःगु जुयाः १३ गतेया लागिं मन्त्रिपरिषदं हे निर्णय यायेमाःगु खः ।

लिसें उगु इलय् प्रम ओलीं नेपाल संवत् नेपाःया राष्ट्रिय संवत् खः, छुं जाति विशेषया संवत् मखु धासें थुकिया न्हूदँ सकल नेपाःमितय्सं उल्लासपूर्वक न्यायेकेमाःगु बिचाः नं तयादीगु खः । प्रतिनिधि मण्डलय् सांसद श्रेष्ठ लिसें प्रदेश सभाया सांसदपिं डा. अजयक्रान्ति शाक्य, राजेश शाक्य व येँ वडा २२ या अध्यक्ष चिनिकाजी महर्जन नं दुथ्याःगु खः ।

लुमंकेबहः जू, प्रदेश नं. ३ य् निर्वाचित येँया सांसद डा. अजयक्रान्ति शाक्यं कार्तिक १३ गते सार्वजनिक बिदा बीमाः धासें सरकारयात छुं ई न्ह्यः सार्वजनिक रुपं इनाप यानादीगु खः । थुकिया बारे थौं च्वनीगु मन्त्रिपरिषद्या बैठकं निर्णय याये फइगु खँ नं नं सांसद श्रेष्ठं कनादिल ।