नेपाल संवत्या प्रणेता शंखधरया दिवस हन

येँ – नेपाल संवतया प्रवर्तक शंखधर साख्वाःयात नेपाल सरकारपाखें राष्ट्रिय विभूति घोषणा याःगु न्हिया लुमंतिइ कछलाथ्व दशमि कार्तिक २८ गते शंखधर दिवस थीथी थासय्न्या येकूगु दु ।

नेपाल संवत् न्हूदँ राष्ट्रिय समारोह समिति ११४२ या ग्वसालय् थनया लखतीर्थय् म्हिगः शंखधर दिवस हनेज्या जुल ।

न्हूदँ समारोह समितिया नायः निरञ्जन शाक्यया सभापतित्वय् न्ह्याःगु थुगु ज्याझ्वलय् येँ महानगरपालिकाया मेयर विद्यासुन्दर शाक्यं मूपाहां जुयाः ज्याझ्वलय् ब्वति कयादीगु खः । मेयर शाक्यं शंखधर साख्वाःया योगदानया बारे चर्चा यानादीगु खःसा उगु ज्याझ्वलय् संघीय सांसद् जीवनराम श्रेष्ठ विशेष पाहांकथं झायादीगु खः ।

अथे हे ज्याझ्वलय् येँ महानगरपालिका १५ वडाया अध्यक्ष नापं येँमपाया प्रवक्ता ईश्वरमान डंगोलं नेपाल संबत्या प्रणेता शंखधरया योगदानया विषयलय् थःगु धारणा तयादीगु खःसा न्हूदँ समारोह समितिया अमृतरत्न ताम्राकारं लसकुस न्वचु बियादीगु खः ।

थुगु ज्याझ्वलय् समारोह समितिया उमेश स्थापित, समाजसेवी सुवर्णमान डंगोलंपिंसं शंखधर साख्वाःया बारे थःथःगु नुगःखँ तयादीगु खः ।
ज्याझ्वलय् पाहांपिं व उपस्थित सकसिनं शंखधर साख्वाःया मूर्तिइ स्वां देछायाः श्रद्धाभाव प्वंकेगु ज्या नं जूगु खः ।