ने. सं. ११४६ बछलाथ्व पञ्चमी - दयावीरसिं बुदिं

किपुलिइ सहिद दिवस हन

किपू(नेपालभाषा टाइम्स)- २०४६ सालय् व्यवस्था परिवर्तनया निंतिं जूगु जनआन्दोलनय् सहादत प्राप्त याःपिं थनया प्यम्ह सहिदया लुमन्तिइ म्हिगः सोमवाः तःजिक सहिद दिवस हन । सहिद स्मृति व्यवस्थापन समितिया ग्वसालय् जूगु ज्याझ्वः किपू नगरपालिका वडा नं. ३ खाःसि बजारय् च्वंगु मभिं पुखलिइ पलिस्था यानातःगु प्यम्ह सहिदया झ्वाताय् स्वां देछासे पिथंगु ¥यालीं किपू देय् चाःहिउगु खः ।

थनिं ३३ दँ न्ह्यः निरंकुश पंचायती व्यवस्था अन्त्यया निंतिं जूगु जनआन्दोलन उत्कर्षय् थ्यनाच्वंगु इलय् किपुलिइ प्यम्हेसिनं सहादत प्राप्त याःगु खः । २०४६ सालया ऐतिहासिक जनआन्दोलनया झ्वलय् चैत २० गतेकुन्हु प्रहरीया गोलीं कयाः थनया लनबहादुर महर्जन, हिराकाजी महर्जन, राजमान माली व राजेन्द्र महर्जनं सहादत प्राप्त याःगु खः । थुपिं प्यम्हेसिनं सहादत प्राप्त याःगु दिंया लुमन्तिइ स्थानीयस्तरं थन दँय्दसं चैत २० गते सहिद दिवस हनेगु याना वयाच्वंगु दु ।

खाःसि बजारय् पलिस्था यानातःगु सहिदया झ्वाताय् स्वां देछायेगु ज्याझ्वलय् येँ क्षेत्र नं १०या प्रतिनिधिसभा सदस्य राजेन्द्रकुमार केसी, पुलांम्ह मन्त्रीलिसें ९ नं क्षेत्रया प्रतिनिधिसभा सदस्य कृष्णगोपाल श्रेष्ठ, बागमति प्रदेश सांसद पुकार महर्जन, किपू नगरपालिकाया प्रमुख राजकुमार नकःमि, उपप्रमुख शुभलक्ष्मी शाक्य (सुनिता), पुलांम्ह नगर प्रमुख रमेश महर्जन, उपप्रमुख सरस्वति रिजाल, जनप्रतिनिधि, कर्मचारीलिसें आपालं किपूमिपिनिगु उपस्थिति दुगु खः । सहिदया झ्वाताय् स्वां देछायेधुंकाः चाःहिउगु ¥याली किपू, पांगा लागा चाःहिलाः नगामय् थ्यंकाः क्वचायेकूगु खःसा ¥यालीइ किपूया आपालं शैक्षिक संस्था, राजनैतिक दल, थीथी सामाजिक संघसंस्था व सर्वसाधारणपिनिगु ब्वति दुगु खः ।

व्यवस्थापन समितिया अध्यक्ष सिद्धिकुमार मानन्धरया सभापतित्वय् जूगु स्वां देछायेगु ज्याझ्वलय् शहीदया लुमन्तिइ १ गू मिनेट मौन धारण याःगु खःसा किपूया कलाकारपिंसं सहिदया लुमन्तिइ म्येँ न्यंकादीगु खः ।

ज्याझ्वलय् नवासें क्षेत्र नं. १०या संघीय सांसद केसीं २०४६ सालय् नेपाली कांगे्रस व नेपाल कम्युनिष्ट पार्टी (एमाले) या मिले जुयाः जनआन्दोलनया नेतृत्व याःगुलिं सफल जूगु खः धासें आन्दोलनया झ्वलय् येँ, यल, ख्वपलिसें देय्या थीथी थासय् व्यापक रुपं प्रहरी दमन व गोली तकं चले जुयाः आपालं आन्दोलनकारी सहिद जूगु खः धयादिल । वय्कलं सहिदया म्हगस साकार यायेत दक्वं शक्ति लगे जुइमाःगु थौं नं उतिकं आवश्यक दु धयादिल ।

व्यवस्थापन समितिया नायःलिसें ज्याझ्वःया सभापति मानन्धरं ३३ क्वःगु सहिद दिवसं देय्या आमूल परिवर्तृनया निंतिं सन्देश बी फयेमा धासें सहिदया म्हगस थौं स्वंगू दशक पुलेधुंकाः नं पूवंके मफुगु तसकं दुःखया खँ धयादिल ।

समितिया सचिव नारायण महर्जनं ऐतिहासिक जनान्दोलन २०४६य् तानाशाही पंचायती शासकपाखें फागुन ८ गते ख्वपय् आन्दोलनकारीतय्त गोलीं कयेकूगु, चैत १७ गते यलय् नं उकथं हे गोलीं कयेूगु व अनंलि चैत २० गते किपुलिइ आन्दोलनकारीतय्त गोलीं कयेकूगु खँ कनादिल ।

देशय् सरकार जक हिलाच्वंगु तर शासन व्यवस्थाय् हिउपाः वःगु अनुभूति आम जनतां आतकं याये मखंगु नापं सहिदया म्हगस पूवंकेत गबलें नं मस्वः धासें सत्ताय् च्वनाच्वंपिं व सत्तां पिनेच्वंपिं दलतय्सं जक मखु आम नेपाःमि जनतां नं सहिदया म्हगस पूवंकेत विचाः यायेमाः धयादिल ।

थ्व हे झ्वलय् थुगुसी ३३ क्वःगु सहिद दिवसया अवसरय् न्हापांखुसी नेपालभाषाया न्हिपौ ‘नेपालभाषा टाइम्स’य् ‘किपूया शहीद’ विशेष तँसापौ नं पिथंगु खः । सहिद दिवसया झ्वलय् किपू नगर चाःहिउगु ¥याली बाघभैरव थ्यंकाः किपू नगरपालिकाया उप–प्रमुख व सकलें वडाअध्यक्षपिं व व्यवस्थापन समितिया जःपिंसं उगु तँसापौया मंकाः पितब्वज्या नं यानादीगु खः ।