सुनिता दकलय् लोकप्रिय उपमेयर

येँ (नेपालभाषा टाइम्स)- येँ महानगरपालिकाय् आः तक वःगु मतगणनाय् उपमेयर पदय् एमालेया उम्मेदवार सुनिता डंगोल फुक्क स्वयां दकलय् अप्वः मत कयाः न्ह्यःने लानाच्वंगु दु । म्हिगः सनिलय् पिहां वःगु ल्याः कथं वय्कःयात ४८ हजार ५१७ मत वयेधुंकूगु दु ।

वय्कःया निकतम प्रतिद्वन्द्वी गठबन्धनया रामेश्वर श्रेष्ठयात १६ हजार ६६० मत वःगु दु । मेयर पदय् दकलय् न्ह्यःने लानाच्वंम्ह स्वतन्त्र उम्मेदवार बालेन्द्र साहयात ४६ हजार ५३४ मत वःगु दु ।

थ्वहे झ्वलय् उपमेयर पदया उम्मेदवार रामेश्वर श्रेष्ठं उपमेयरया मतगणना हानं यायेमाल धकाः निर्वाचन ज्याकुथिइ निवेदन बिउगु खः । येँ महानगरपालिकाय् कलम चिं बाहेक थम्हं उपमेयर पदय् व सिमा चिं बाहक कांग्रेसं मेयर पदय् उम्मेदवारी बिउगु खँ न्ह्यथँसें श्रेष्ठं सिमा चिंलय् उपमेयर पदय् उम्मेदवारी मलासे खाली दुगु खँ न्ह्यथनातःगु दु । उम्मेदवार हे मदुगु उपमेयर पदय् सिमा चिंलय् मत संकेत दुगुलिं थः उम्मेदवार दुगु कलम चिंया मत संकेतयात तकं बदर यानाः गणना याःगु खँय् श्रेष्ठं असन्तुष्टि प्वंकादीगु खः ।