‘नेपाल भेरियन्ट’ नं लूगु खः?

येँ – नेपालय् कोरोना भाइरसया ‘न्हूगु भेरियन्ट’ लूगु सम्बन्धी जानकारी बीत नेपालं बेलायत सरकारयात माग याःगु दु । नेपालय् कोरोनाया न्हूगु भेरियन्ट लूगु धासें बेलायतं पिहां वइगु ‘डेली मेल’ पत्रिकां कभर स्टोरी दयेकूगु खःसा वयां लिपा थीथी अनलाइन पोर्टलतय्सं उगु हे समाचारयात माध्यम दयेकाः थःगु अनलाइनय् समाचार तयाहःगु खः ।

म्हिगः स्वास्थ्य तथा जनसंख्या मन्त्रालयया प्रवक्ता कृष्ण पौडेलं नेपालय् न्हूगु भेरियन्ट लूगु बारे जानकारी बीत बेलायतया इन्टरनेशनल हेल्थ रेगुलेसनयात ईमेलपाखें पौ च्वयादीगु खः । बेलायती सञ्चार माध्यमं च्वःगु समाचारयात कयाः जानकारी बीगु झ्वलय् वय्कलं धयादिल, ‘बेलायती सञ्चार माध्यमं नेपालय् न्हूगु भेरियन्ट लूगु दाबी याःगु खनिं । तर थुकिया बारे जिमित जानकारी मदु । नेपालं बेलायत वंपिंके डेल्टा बी.१.६१७.२ न्हूगु भेरियन्ट लूगु दु । थ्व भारतीय भेरियन्ट खः । शायद उकियात हे नेपाःया भेरियन्ट धाःगु जुइफु ।’

बेलायती सञ्चार माध्यमय् वःगु समाचारं थःपिं अजूचाःगु खँ कँसें वय्कलं धयादिल, ‘नेपालय् अल्फा व डेल्टा भेरियन्ट लूगु दु, तर आकाझाकां न्हूगु भेरियन्टया खँ वःगुलिं जिपिं नं अजू चायाच्वना । उकथं हे विश्व स्वास्थ्य संगठनं नं नेपालय् न्हूगु भेरियन्ट लूगु जानकारी थःपिंत मदुगु खँ धायेधुंकूगु दु ।’
मन्त्रालयया प्रवक्ता पौडेलं नेपालय् गुगु भेरियन्ट न्यना वनाच्वन धइगु बारे नियमित अध्ययन जुयाच्वंगु खँ धासें भेरियन्ट लुइकेत जिन सिक्वेन्सिङ जुयाच्वंगु दु तर न्हूगु भेरियन्ट लूगु बारे धाःसा थःपिंके जानकारी मदुगु खँ स्पष्ट यानादीगु दु ।

‘डेली मेल’ पत्रिकां पोर्चुगलय् ‘नेपाल भेरियन्ट’ लूगु दु, अथे जुयाः पोर्चुगलयात ग्रीन जोनं चीकेमाः धकाः समाचार च्वःगु खः । पत्रिकाय् नेपालय् उत्परिवर्तित जूगु कोरोना युरोपेली देशय् न्यना वंगुलिं बेलायतं पिने चाःहिउ वनीपिंत हाथ्या वये फइगु ख्याच्वः समेत बियातःगु खः ।

‘डेली मेल’ पत्रिकाया आलोचना
बेलायती पत्रिकाय् पिहां वःगु उगु समाचारयात कयाः नेपालय् गाक्कं आलोचना जूगु दु । पत्रिकां सनसनी पिकायेत जक अज्याःगु समाचार च्वःगु खँ नेपाःया विज्ञतय्सं धाःगु दु । नेपाः व बेलायत दथुइ सरकारीस्तरय् कोभिड सम्बन्धी सुचं कालबिल जुया वयाच्वंगु दुसां बेलायत सरकारं छ्वयाहःगु छुं नं सुचनय् थज्याःगु खँ धाःसा दुमथ्याःगु खँ नेपाःया अधिकारीतय्सं धाःगु दु ।

विज्ञतय्सं धाः कथं नेपालय् आः तक बेलायतय् खने दुगु अल्फा भेरियन्ट व भारतय् खने दुगु डेल्टा व कापा भेरियन्ट खने दत धइगु खँ पुष्टि जूगु दु । नेपाः हे उद्गमस्थल जूगु न्हूगु भेरियन्ट आः तक लूगु मदुनि । अथे खःसां नेपालं न्हूगु भेरियन्ट लुइफु धकाः जीन सिक्वसेन्सिङ यायेगु ज्या धाःसा जुया हे च्वंगु खँ नं धाःगु दु ।