फुसिंख्यः भजन खलःयात सतः

येँ – फुसिंख्यः मनमैजुइ च्वंगु भजन खलःयात सतः लःल्हाःगु दु । फुसिंख्यःया तुब्व भजन खलःयात सतः लःल्हाःगु दु । वंगु शनिवाः जूगु छगू ज्याझ्वःया दथुइ थनया चःमति त्वाःया पूर्णकाजी ज्यापुं थः बाज्या व अजिया नामं दयेकादीगु धन–ज्ञानी सतः फुसिंख्यः तुब्व भजन सतः लःल्हानादीगु खः ।

सतः लःल्हायेगु झ्वलय् महाद्यः, गणेद्यः, भैलःद्यः, अजिमालिसें चीभाःया नं प्राणप्रतिष्ठा पुजा याःगु खःसा वयां लिपा फुसिंख्यःया मनमैजु इन्द्रायणी व गणेद्यःपाखें सतःया लुखा चायेकाः त्वाः देवाय् मत च्याकाः सतःया उलेज्या याःगु खः ।भजन खलःया नायः तक जुयादीम्ह दाता ज्यापुं उगु थासय् न्हापा थः बाज्या अजिपिंसं तु पिनाः उकिया चाकु दयेकाः मीगु ज्या याःगु लुमन्ति कनादिल ।

मनमैजु धइगु थाय् अजिमा द्यःया क्यब जूगुलिं अन सःगु ज्वलंत दकलय् न्हापां अजिमा द्यःया छाये धुंकाः जक थःपिंसं उपभोग याइगु खँ वय्कलं कनादिल ।

करिब नीगू लाख तका लागतय् बापी जग्गाय् भजन सतः दयेकाः लःल्हाःगु ज्याझ्वलय् फुसिंख्यः मनमैजुया अजिमा व गणेद्यः मूपाहां कथं बिज्याःगु खःसा स्थानीय ज्येष्ठ नागरिक तरिभाई डंगोल (९९ दँ) व स्थानीय समाजसेवी राजन गिरीपिं पाहांकथं झायादीगु खः । ज्याझ्वः लिपा स्थानीय भजन खलः व स्वयम्भू ज्ञानमाला भजन खलःपाखें भजन नं न्ह्यब्वःगु खः ।

सम्बन्धित बुखँ

LEAVE YOUR COMMENTS