संस्कृति सम्पदा संरक्षणय् सरकार दुगु महसुस याकेगु कुतः यानाच्वना

येँ- येँ महानगरपालिकाया प्रमुख विद्यासुन्दर शाक्यं गुथिं संचालन यानाच्वंगु सांस्कृतिक सम्पदाय् सरकार दुगु महसुस याकेगु कुतः यानाच्वनागु खँ धयादीगु दु । क्वाःपाःछेँ, द्यःछेँ, सतः, बहाः बही, गुथि छेँ, ल्वहंहिति आदि सम्पदा व गुथिं संचालन यानाच्वंगु सांस्कृतिक सम्पदा संरक्षणय् सरकारया उपस्थिति दु धइकथंया महसुस याकेगु कुतः जुयाच्वंगु खँ धयादीगु खः ।

गुथि परम्परायात जीवन्त याना तयेत समुदायया ज्यायात राज्यपाखें महानगरं ग्वाहालि याइ धासें येँ महानगर प्रमुख शाक्यं धयादिल, ‘थज्याःगु सांस्कृतिक सम्पदा पुनःनिर्माण यानाः संचालन व व्यवस्थापनया निंतिं गुथियात स्वामित्व हस्तान्तरण यायेगु यानाच्वनागु दु, गुथिया स्वामित्व व क्रियाकलापय् गुगुं कथंया नं हस्तक्षेप यायेगु जुइमखु ।’

येँ महानगर प्रमुख शाक्यं उगु खँ थनया सीघलय् च्वंगु धर्मकीति विहारया विस्तारित भवनया उलेज्या यायेगु झ्वलय् धयादीगु खः । वय्कलं बुद्ध दर्शनया प्रवद्र्धनया निंतिं वज्रयानी, थेरवादी, महायानीया विहारत पुनःनिर्माणलिसें अन जुइगु थीथी ज्याझ्वःया निंतिं नं ग्वाहालि यानाच्वनागु दु धयादिल । महानगरया हे आर्थिक ग्वाहालिं शंखम्वलय् च्वंगु अन्तर्राष्ट्रिय बौद्ध भावना केन्द्रया धम्म हलया उलेज्या जुइधुंकूगु नापं बागबजारय् च्वंगु बुद्ध विहार नं पुनःनिर्माण सिधयाः आः उलेज्या जक याये ल्यं दुगु नं वय्कलं कनादिल ।

उपप्रमुख हरिप्रभा खड्गी श्रेष्ठं स्थानीय सरकार धइगु स्थानीय पहिचान ल्यंकेत नापं स्थानीय स्तरय् दुगु समस्या समाधान खः धासें सम्पदा संरक्षणया निंतिं वइगु गुगुंकथंया प्रस्ताव वा योजनायात नं थःपिंसं मतभेद यायेगु जुइमखु धयादिल ।

थगुने मंसिर २० गते येँ महानगर प्रमुख शाक्यं हे शिलान्यास यानादीगु विहारया विस्तारित भवन शनिवाः उलेज्या याःगु खः । विस्तारित विहार भवनया निंतिं ४ गू करोड २८ गू लख लागत अनुमान यानातःगुलिइ न्हापांगु चरणय् छगू करोड लागतया निर्माणया ज्या जूगु खः । उकी ८५ प्रतिशत अर्थात ८४ गू लख ९९,२१० महानगरं व १५ प्रतिशत अर्थात १४ गू लख ९९,८७४ तका उपभोक्ता समितिं व्यहोरे याःगु खः ।
अथे हे वंगु पुस २९ गते निगूगु चरणया ज्याया निंतिं २ गू करोड १८ गू लख थप अनुदान उपलब्ध याकूगु खः ।