ने. सं. ११४३ ञलाथ्व चतुर्दशी -

छत्रपाति चिकित्सालयया माउ बद्रि भवनया शिलान्यास

येँ- छत्रपाति निःशुल्क चिकित्सालयया न्हूगु भवन निर्माणया निंतिं जग स्वनेगु ज्या जुल । वंगु बुधवाः चिकित्सालयया न्हूगु भवन निर्माणया निंतिं जग स्वनेगु ज्या जूगु खः । येँ महानगरपालिकाया प्रमुख विद्यासुन्दर शाक्य, उपप्रमुख हरिप्रभा खड्गी श्रेष्ठ, येँ मनपा १७ वडाअध्यक्ष नविन मानन्धर व चिकित्सालयया अध्यक्ष डा. मनोजमान श्रेष्ठं मंकाःकथं चिकित्सालयया अत्याधुनिक भवनया भूमि पुजालिसें जग स्वनादीगु खः ।

ज्याझ्वलय् नवासें येँ महानगर प्रमुख शाक्यं चिकित्सालय न्हूगु युगय् प्रवेश याःगु दु धासें इलय् हे स्तरीय ज्या यायेत इनाप यानादिल । लिसें वय्कलं जनताया सेवाय् समर्पित व बांलाःगु ज्या जुइगु थासय् ध्यबाया अभाव जुइके बी मखु धासें निजी ख्यःलिसे प्रतिस्पर्धी सेवा बी मफुत धाःसा लगानीया उपयोग जुइ मखु उकिं थज्याःगु खँय् ध्यान बीमाः धयादिल ।

योजनात इलय् कार्यान्वयन मजुल धाःसा आर्थिक भार थप जुया वनीगु खँय् सचेत जुइत इनाप यासें महानगरं थगुने नं अस्पताल भवनया निंतिं ५ गू करोड तका विनियोजन यानागु व थगुने ज्या मजुइवं ध्यबा खर्च याये मखंगु धासें मेखे थुगु दँय् लागत खचं नं अप्वःगु दु धयादिल ।

उपप्रमुख खड्गी श्रेष्ठं कोरोना रोकथाम, उपचार व नियन्त्रणया निंतिं सामुदायिक व सरकारी अस्पताललिसे सहकार्य यानागु खँ कनादिसें व्यक्ति स्वस्थ जूसा जक सरकारं उपलब्ध याकूगु सेवा सुविधा व अधिकार प्रयोग यायेफइ धयादिल । वडाअध्यक्ष मानन्धरं समुदाययात समस्या जूगु इलय् चिकित्सालयं व चिकित्सलयात समस्या जूगु इलय् महानगरं ग्वाहालि याःगु खँ कनादिल । वय्कलं ०७२ सालय् भुखाय् व ०७५ य् डेंगु व आः वयाः कोरोना महामारीया इलय् चिकित्सालयया योगदान च्वछायेबहजू धयादिल ।

अस्पतालया अध्यक्ष डा. श्रेष्ठं वइगु वालंनिसें हे न्हिं १०० सिलिन्डर अक्सिजन उत्पादन यायेगु क्षमताया प्लान्ट जडान यायेत्यनागु जानकारी बियादिसें अस्पतालया विकासया निंतिं महानगरपाखें प्राप्त ग्वाहालि व अभिभावकीयपाखें विकसित जुइत ह्वःताः चूलाःगु दु धयादिल ।

चिकित्सालय परिसरय् च्वंगु १० आना १ दाम क्षेत्रफलय् ३५ गू करोड लागतय् दयेकेत्यंगु न्हूगु भवन छगू तल्ला भूमिगतलिसें न्हय्तँ जाःया जुइ । महानगरं उपलब्ध याकूगु न्यागू करोड व दातातय्पाखें संकलन याःगु छगूत्या करोडपाखें भवन निर्माण शुरु यायेत्यंगु खः । महानगरं उपलब्ध याकीगुमध्ये निगूत्या करोड बीधुंकूगु दुसा आः उकी निगूत्या करोड थप याना बीत्यंगु खः ।