
येँ (नेपालभाषा टाइम्स)÷खुदँ न्ह्यः भारतय् जूगु नोटबन्दीया कारणं नेपालय् कारोवार बन्द जुयाच्वंगु न्यासः व द्वःछि तका वंगु भारु हानं चले यायेगु लागिं नेपाःया व्यापारीतय्सं नेपाः सरकारयात इनाप याना हःगु दु ।
उगु इलय् भारतं नोटबन्दी यायेवं नेपालय् भारु मुंकातःपिं आपालं व्यापारीत मर्काय् लाःगु खः । नेपालं भारतयात इनाप याःबलय् भारत सरकारं राष्ट्र बैंकयाके दुगु ध्यबा जक हिला बी धकाः लिसः बियाहःगु खः । अबलय् राष्ट्र बैंकयाके मुक्कं ६ करोड भारु जक दुगु खः । तर भारतीय व्यापारीतय्के धाःसा अर्बौं तका दयेमाःगु अनुमान याःगु खः । अबलय् भारतं नोट हिला मबिउगु कारणं नेपालय् भारु सुचुकातःपिं व्यापारीतय्गु अर्बौं तका दां भ्वं जूगु वंगु खः । वयां लिपा नेपालं न्यासः व द्वःछि वंगु भारु नेपालय् चले मयासे बन्द याना बिउगु खः ।
नेपालं तःधंगु रकमया भारु बन्द याःसां उकियात व्यवसायीतय्सं खास हे आपत्ति मप्वंकूगु खःसां आः वयाः धाःसा न्यासः व द्वःछि तका वंगु भारु हानं चले याये माल धकाः नेपाः सरकारयात इनाप याना हःगु दु ।
विज्ञ सूत्रं धाः कथं थौंकन्हय् कोरोनाया महमारी म्हो जुइवं नेपाः चाःहिउ वइपिं भारतीय पर्यटकत नं अप्वया वयाच्वंगु दु । नेपाः चाःहिउ वइपिं भारतीय पर्यटकत न्यासः व द्वःछि वंगु भारु ज्वनाः वइगु वा कार्ड हे ज्वना वःसां उमित थन न्यासः व द्वःछि तका वंगु भारु मालीगु जूगुलिं उमित अःपुकेगु लागिं नं नेपालय् थ्व भारु चले याके माली धकाः नेपाःया व्यवसायीतय्सं माग याना हःगु खः । थ्व ध्यबा भारतय् चले जूगु तर नेपालय् जक चले मजूगु कारणं समस्या जुयाच्वंगु खँ धाःगु दु ।
LEAVE YOUR COMMENTS