केपी ओलीयात माधव नेपालया लिसः – सर्वोच्चया फैसला कथं भोट

येँ – एमालेया वरिष्ठ नेता माधव नेपालं सर्वोच्च अदालतया फैसला व लोकतान्त्रिक मूल्य मान्यता कथं हे प्रधानमन्त्री शेरबहादुर देउवायात विश्वासया मत बियागु धकाः स्पष्टीकरण बियादीगु दु ।

पार्टी अध्यक्ष केपी ओलीं म्हीग न्यनाहःगु स्पष्टीकरणया लिसः बिसें नेता नेपालं फागुन २३ कुन्हु सर्वोच्चं बिउगु फैसला लिपा न्हूगु परिस्थितिइ हाकनं पार्टी एकता प्रक्रिया न्ह्याकेगु पलेसा विचार समूहयात जक कःघाःगुलिं समस्या ब्वलंगु खँ नं धयादीगु दु ।

स्पष्टीकरण पती वय्कलं च्वयादीगु दु, ‘फागुन ११ गते सर्वोच्च अदालतं प्रतिनिधिसभा पुनस्र्थापना यायेधुंकाः अध्यक्ष ओलीं पदं राजीनामा बीमाःगु खःसां नं सत्ताय् च्वनाच्वंगु कारणं बैशाख २७ कुन्हु विश्वासया मत काःगु इलय् जि थः तकं उकी अनुपस्थित जुयागु खः ।’
ओलीं पार्टी व दलया निर्णय बिना हे संविधानया थीथी प्रावधान अन्तर्गत थः हे प्रधानमन्त्री जुइत स्वयेगु पार्टीया विधान व राजनीतिक नैतिकताया अःखः ज्या जूगु धासें

उकिया विरोध स्वरुप थीथी क्रियाकलाप जूगुलिं उकियात पार्टी विधान अःखः धाये मजिउ धइगु तर्क नं नेता नेपालं तयादीगु दु ।

पार्टी अध्यक्ष ओलीं विधानया गम्भीर उल्लंघन याःगुलिं थः विपक्षय् दनेमाःगु खः धासें नेता नेपालं धयादीगु दु, ‘अध्यक्षं याःगु गैरसंवैधानिक, विधान विपरित सर्वोच्च अदालतया आदेशया बर्खिलाप व अलोकतान्त्रिक ज्याया प्रतिवाद कथं यानागु छगू लोकतान्त्रिक अध्यासयात वैचारिक राजनीतिक अन्तर विरोधया रुपय् थुइकाः उकथं हे वार्ता, सहलह व सहमति यानाः पार्टीयात छधी यायेमाःगु आवश्यकता जुयाच्वंगु दु ।’

न्हापा लिपा ढुलमुले नीति काइम्ह धकाः आलोचित नेता माधव नेपालं थुगुसी कडा अडान कयाः ओलीयात धमाधम हे थःगु निर्णयं लिहां वनेत बाध्य यानाच्वंगु कारणं नेता नेपालयात तारिफ याइपिं यक्व पिहां वयाच्वंगु दु ।

एमालें स्पष्टीकरण न्यना हःपिं मेपिं सांसदतय्सं नं थज्याःगु हे व्यहोराया पौ बीगु तयारी यानाच्वंगु खँ सीदुगु दु ।

सम्बन्धित बुखँ

LEAVE YOUR COMMENTS