त्वरं अजिमाया खः जात्रा

येँ(रासस)- येँ महानगरपालिका ५ वडा नरः लागाय् न्यायेकीगु म्वःपताः द्यःया जात्रा मंगलवाः बहनि त्वरं अजिमाया खः म्वःपताः द्यःयाथाय् हःगु दु । खः म्वःपताः द्यःया देगलय् हयेधुंकाः द्यः ल्वाकाः अनसं च्वंगु द्यःछेँय् बिज्याकूगु खः ।

थुगु खतय् त्वरं अजिमायात स्वन्हुलिपा जक बिज्याकीगु जूगु दु । थ्व स्वयां न्ह्यः मंगलवाः न्हिनय् सिन्हः जात्रा याःगु खः । सिन्हः जात्रा लिपा म्वःपताः द्यःयात उगु लागाया मिसा पुचलं करिब निघौतक विशेष पुजा याःगु येँ महानगरपालिका ५ वडाअध्यक्षलिसें जात्रा संचालन समितिया अध्यक्ष रमेश ढंगोलं जानकारी बियादिल ।

त्वरं अजिमाया तंगु तिसा मालेत दँय्दसं चौलाथ्व चतुर्दशिनिसें नरः लागाय् जात्रा शुरु जुइ । जात्राया थीथी प्रक्रिया पूवंकेधुंकाः चौलागा पारुया दिंकुन्हु नरःया तिसा मालेगु पुखुलिइ त्वरं अजिमाया तंगु तिसा मालेगु जात्रा क्वचायेकूगु खः ।

थुकथं हे दँय्दसं चौलाथ्व चतुर्दशिकुन्हु निसें न्ह्याइगु म्वःपताः द्यःया जात्रा येँ महानगरपालिका ५ वडा हाडिगामय् व ४ वडाया त्वरं अजिमा द्यःया जात्रा बालुवाटार लागाय् तःजिक हनेगु याइ । जात्राय झ्वलय् जा थुयाः उकिया द्यः दयेकाः त्वरं अजिमा द्यःयाथाय् यंकाः विधिपूर्वक पुजा याइ ।

म्वःपताः द्यःया जात्रा येँय् न्ययेकीगु महत्वपूर्ण व ज्वःमदुगु जात्रा मध्ये छगू खः । थुकियात हाडीगांया जात्रा, त्वरं अजिमाया जात्रा, तिसा मालेगु जात्रा, म्वःपताः द्यःया जात्रा आदि थीथी नामं नं म्हसिउ ।