प्रजापतियात जागिरं लिकाःगु मू कारण सार्वजनिक

येँ (नेपालभाषा टाइम्स)÷ येँ महानगरपालिकाय् मेयरया उम्मेदवार केशव स्थापितयात यौन दुव्र्यहार याःगु द्वपं बिया वयाच्वंम्ह रश्मिला प्रजापतियात उबलय् यँे मनपाया सफाइ कर्मचारीतय्सं चिइकेगु माग यानाः हडताल याःगु व आर्थिक अनियमितता याःगु कारणं जागिरं लिकयाहःगु खँ सार्वजनिक जूगु दु । थीथी संचार माध्यमतय्सं मय्जु प्रजापतियात कारवाही यायेगु निंतिं मजदूरतय् प्रतिनिधि व मनपा प्रशासनया प्रतिनिधि च्वनाः निर्णय याःगु म्यान्युट सार्वजनिक यासें आर्थिक अनियमितता याःगुलिं जागिरं लिकयाहःगु खँ न्ह्यथँगु दु ।

उगु म्यान्युटय् येँ मनपाया प्यंगू कर्मचारी संगठनया प्रतिनिधि व तत्कालिन कार्यकारी अधिकृतं खटे यानाहःपिं निम्ह सहित छगू समिति दयेकेगु व उगु समितिं बिउगु प्रतिवेदन कथं कसुर स्वयाः कारवाही यायेगु निर्णय यानातःगु दु । थुगु समितिं बिउगु प्रतिवेदन कथं हे प्रजापतियात जागिरं लिकयाहःगु खः ।

उबलय् येँ मनपाया हनुमानढोका दरवार क्षेत्र संरक्षण कार्यक्रमया शाखा अधिकृत कथं ज्या यानाच्वंम्ह प्रजापतिं छम्ह गाडी चालक व छम्ह सफाइ कर्मचारीयात म्हुतुल्हानाः ब्वःबिउगुलिं तत्कालिन कर्मचारी युनियनतय्सं प्रजापतियात चिइकेमाःगु माग यानाः सतकय् च्वंगु फोहर हे ममुंसे आन्दोलन याःगु खः ।

आन्दोलनया कारणं फोहर हे उठे मजुइगु अवस्था वयेवं तत्कालिन सहायक कार्यकारी अधिकृत गोपाल प्रसाद पराजुली सहित कर्मचारी संगठनतय् प्रतिनिधि दथुइ जूगु बैठकं प्रजापतियात कयाः छानविन यायेगु व आवश्यक कथं कारवाही यायेगु निर्णय याःगु खः । थ्व हे समितिया प्रतिवेदन कथं २०६० कात्तिक ३ गते तत्कालिन नि. कार्यकारी अधिकृत गोपाल प्रसाद पराजुली सहि यानाः जागिरं अवकाश यानागु पौ बिउगु खः ।

प्रजापतिं धाःसा थःत येँ मनपाया तत्कालिन मेयर केशव स्थापितं थःम्हं यौन प्रस्ताव माने मयानागुलिं जागिरं लिकाःगु द्वपं बिया वयाच्वंगु दु । थौंकन्हय् येँ मनपाया मेयरया निंतिं एमालेपाखें उम्मेदवार जुयाच्वंम्ह स्थापितं नं थःम्हं लिकयागु मखसें कर्मचारीतय्गु आन्दोलनया कारणं हे लिकाःगु खँ धयादीगु दु ।

छगू कलेजया ज्याझ्वलय् मेयर स्थापितं यौन दुव्र्यवहारया न्ह्यसः तःम्ह छम्ह मिसायात दुव्र्यवहार यात धकाः भाइरल जुयाच्वंगु भिडियोया न्ह्यःनेया ब्वय् नं स्थाथितं प्रजपातियात लिकाःगु कारणं धयादीगु दु । उगु भिडियोय् स्थापितं थः जनता समाजवादी पार्टी पाखें चुनाव ल्वानागु इलय् मय्जु रश्मिला प्रजापति हे थःगु चुनाव प्रचारय् लगे जूगु खँ नं धयादीगु दु । ‘छगू हे पार्टी दुबलय् जिपिं नापनापं हे चुनाव प्रचारय् जुयागु खः, उबलय् ला वय्कलं थज्याःगु द्वपं बियामदी’ स्थापितं धाःगु दु ।

वय्कःया पार्टीं मखसे विपक्षीं चुनाव ल्वानागु इलय् जक थःत बदनाम यायेगु निंतिं यौन दुव्र्यवहार याःगु द्वपं बिइगु यानाच्वंगु धासें स्थापितं उबलय् हे यदि थःम्हं अज्याःगु दुव्र्यवहार याःगु खःसा कानुनी रुपं वयेत चुनौति नं बियादीगु खः । उगु ज्याझ्वलय् स्थापितं थःत दुव्र्यवहारया द्वपं बियाच्वंम्ह प्रजापतियात छु कारणं जागिरं लिकाःगु खः, उबलय् प्रजापतिं कर्मचारीतय्त गज्याःगु व्यवहार याःगु खः, उकियात सार्वजनिक यायेगु खँ नं धयादीगु खः ।

‘जिपिं वय्कःयात बांमलाइगु खँयात पित महये धयागु पक्षय् दुगु खः, तर आः अति जुल, थ्व खँ सार्वजनिक जुइ, थुकिं वय्कःयात बांमलाःगु क्षति जुइ’ स्थापितं धाःगु दु ।

 

ने.सं. ११४२ बछलाथ्व २

सम्बन्धित बुखँ

LEAVE YOUR COMMENTS