सर्वोच्चया फैसला संघीयता विरोधी

येँ – संघीय लोकतान्त्रिक राष्ट्रिय मञ्चं लोकसेवा आयोगया विज्ञापन कायम याना तयेगु सर्वोच्च अदालतया फैसलाया विरोध याःगु दु । मञ्चया अध्यक्ष कुमार लिङ्देनं प्रेस विज्ञप्ति मार्फत थ्व विरोध यानादीगु खः । विज्ञप्तिइ लोकसेवा आयोगया विज्ञापन शत प्रतिशत संघीयता विरोधी, संविधान विरोधी व आदिवासी जनजाति, दलित, मधेशी विरोधी जूगुलिं अज्याःगु विज्ञापनय् सर्वोच्च अदालत तकं मुछे जुइगु उचित मजूगु खँ न्ह्यथनातःगु दु ।

विज्ञप्तिइ सर्वोच्च अदालतया थज्याःगु निर्णयं नेपालय् जातीय ध्रुवीकरण तीव्र जुइगु व जातीय द्वन्द्व अप्वइगु ख्याच्वः नं बियातःगु दु ।
सत्तारुढ दल नेपाल कम्युनिष्ट पार्टी (नेकपा)या सांसद पम्फा भुसालं नं थुकिया विरोध यानादीगु दु । वय्कलं लोकसेवा आयोगया विज्ञापन न्ह्यःने न्ह्याकेत सर्वोच्च अदालतं बिउगु आदेश प्रतिगमनया पराकाष्ठा जूगु द्वपं बियादीगु खः ।

वय्कलं संसदया राज्य व्यवस्था तथा सुशासन समितिया बैठकय् फुक्कं वर्ग, क्षेत्र व समुदायया समावेशी, समानुपातिक सिद्धान्तया आधारय् प्रतिस्पर्धाय् न्ह्याःवनेत समितिं बिउगु निर्देशनयात हाचां गायाः सर्वोच्च अदालत संघीय लोकतान्त्रिक गणतन्त्रया विरोधय् दंवःगु द्वपं नं बियादिल ।