देय्न्यंकं साइकलमैत्री शहर निर्माण गुरुयोजना किपुलिं न्ह्यात
किपू(नेपालभाषा टाइम्स)- किपुलिइ साइकलमैत्री दयेकेगु गुरुयोजनाया ज्या न्ह्याःगु दु । स्वनिगःलिसें देय्न्यंकंया सहरयात साइकलमैत्री दयेकेगु गुरुयोजना किपुलिं शुरु याःगु खः ।
किपू नगरपालिकाया प्रमुख रमेश महर्जनं उगु गुरुयोजनाया शुरुवात यानादीगु खः । वि.सं. २०७९ न्हूदँया लसताय् लाकाः साइकल सहरया गुरुयोजनाया शुरुवातलिसें उगु इलय् साइकल ¥याली नं जूगु खः । किपू नगरपालिकाया ग्वसालय् जूगु साइकल सहर गुरुयोजनाया शुभारम्भ प्यांक बाइकया ग्वाहालि व सहकार्यय् जूगु खः ।
देय्न्यंकंया सहरयात साइकल मैत्री यायेगु गुरुयोजनाया उलेज्या यासें नगर प्रमुख महर्जनं स्वास्थ्यया निंतिं फलदायी, लाभदायीलिसें इन्धनया नं बचत जुयाः आर्थिक लाभ नं जुइगुलिं थ्व योजना अतिकं महत्वपूर्ण जूगु विचाः तयादिल ।
किपू नगरपालिकाया न्हूगु प्रशासनिक भवनं न्ह्याःगु साइकल ¥याली किपू नगर परिक्रमा याःगु खः । ¥यालीइ किपू नगरपालिका २ वडाअध्यक्ष रमेशमान डंगोल, ६ वडाअध्यक्ष न्हुछेबहादुर महर्जन, १० वडाअध्यक्ष अमन महर्जनलिसें प्यांक बाइकया संचालक दिरेक मानन्धर, डा. तारालाल श्रेष्ठ लिसें आपालं साइकलपे्रमीतय् सहभागिता दुगु खः ।
थ्व हे झ्वलय् गुरुयोजना अन्तर्गत साइकल सेयरिङ ज्याझ्वः नं तयातःगु दुसा थ्व अन्तर्गत किपू, यल व ख्वप देय्यात स्वायेगु योजना दु । किपुलिं शुरु जुइगु साइकल सेयरिङ ज्याझ्वः अन्तर्गत यल व ख्वपय् तक अःपुके थ्यंके फइगु खँ धाःगु दु । थुकिया निंतिं प्यांक बाइकया सफ्टवेयरय् दर्ता यानाः आवश्यक शुल्क पुलाः किपुलिइ च्वंगु प्याकं बाइकपाखें साइकल कयाः यल व ख्वपय् च्वंगु प्यांक बाइकय् वनाः साइकल त्वःतेगु व्यवस्था यानातःगु दु । अथे हे ख्वप वा यलं वइपिंसं उखें प्यांक बाइक कया हयाः किपुलिइ त्वःते फइ ।
येँया असं कमलाछि त्वालय् च्वंगु देय्या हे दकलय् पुलांगु साइकल पसः अष्टनारायण पंचनारायणया प्यंगूगु पुस्ताया दिरेक मानन्धरं साइकल सेयरिङया अवधारणा न्ह्यःने हयादीगु खः । पेशागत रुपं इन्जिनियर मानन्धरं थः पुख्र्यौली पेशा साइकल मीगु जक मखसे आधुनिक युगलिसे साइकलयात नं स्वाका यंकेगु ल्याखं थुगु अवधारणा न्ह्यःने हयागु जानकारी बियादिल ।
साइकल सेयरिङया निंतिं प्रति ५ किलोमिटरय् छगू स्टेशन दयेमाःगु तर नेपालय् न्ह्यःने लाःथाय् साइकल त्वःते फइगु अवस्था मदुगुलिं स्थानीय निकाय, होटल, रेष्टुरा आदि छगू निश्चित थाय्यात स्टेशन कायम यानाः थुकथंया सेवा संचालन यायेगु लक्ष्य दुगु नं वय्कलं स्पष्ट यानादिल ।
LEAVE YOUR COMMENTS