ल्वाभः त्वःतूसा जक विप्लवलिसे वार्ता
येँ – सरकारं नेकपा विप्लव पुचलं हतियार लःल्हाःसा जक वार्ता जुइ फइगु खँ धाःगु दु । बिहीवाः मन्त्रिपरिषदया निर्णय सार्वजनिक यायेत ग्वसाः ग्वःगु पत्रकार सम्मेलनय् सरकारया प्रवक्ता लिसें सञ्चारमन्त्री गोकुल बास्टोलां उगु खँ धयादीगु खः । हिंसात्मक गतिविधि याःगु धासें सरकारं वंगु फागुन २८ गते विप्लव पुचःयात प्रतिबन्ध तयेगु निर्णय याःगु खः ।
पत्रकार सम्मेलनय् मन्त्री बास्कोटां धयादी, ‘संवादया निंतिं जिपिं तयार दु । तर, संवाद गलत गतिविधिलिसे जुइ फइ मखु । वार्ताय् च्वने न्ह्यः हतियार त्वःतेमाः, हिंसा त्वःतेमाः ।’वय्कलं छुं असन्तुष्टि दुसा शान्तिपूर्ण राजनीति व वार्तापाखें संबोधन यायेफइगु खँ धासें धयादी, ‘राजनीतिक मैदान खाली दु, न्ह्याथाय् म्हितूसां जिउ ।’
मेखे विप्लवं काभ्रे गोलीकाण्डय् प्रहरी जवाफी कारबाही धकाः याःगु दावीयात नेकपा विप्लवं बकवास टिप्पणी याःगु दु । बिहीवाः मध्य केन्द्रीय कमाण्डया इञ्चार्ज हेमन्तप्रकाश ओली ‘सुदर्शनं’ छगू विज्ञप्ति जारी यासें काभ्रे गोलीकाण्डयात कयाः पार्टीया आधिकारिक धारण पित बिउगु खः ।
वंगु चैत ५ गते काभ्रेया रोशी गाउँपालिकाय् विप्लव पुचःया कार्यकर्तां प्रहरीयात गोली कयेकूगु व जवाफी कारबाहीया झ्वलय् विप्लवया निम्ह कार्यकर्ता ज्वनागु व मेपिं फरार जूगु खँ धाःगु खः । विज्ञप्तिइ निहत्था अभियानकर्मीयात प्रहरीं गोली चले यानाः ज्वंगु धासें विप्लव पुचःपाखें गोली चले यात धइगु खँ फय्गं खँ खः धयातःगु दु ।
अथे हे विज्ञप्तिइ सरकारया थ्व मखुगु बकवासं जनयुद्धकालया संकटकालयात लुमंकूगु धासें तत्काल थःपिनिगु प्रहरी वा सुरक्षा निकाययात आक्रमण यायेगु पार्टीया नीति हे मदुगु व दलाल पुँजीवादया विरुद्ध थःपिनिगु आन्दोलन न्ह्यानाच्वंगु खँ धाःगु दु । अथे हे विज्ञप्तिइ वर्तमान सरकार, गृह प्रशासन व सुरक्षा निकाय देय्यात गृहयुद्धय् घ्वानाः भ्रष्टाचार, हाकु बजाः आदियात सुचुकेत स्वयाच्वंगु द्वपं बियातःगु दु ।
मेखे विप्लव माओवादी विरुद्ध सेना परिचालन जुल धकाः वयाच्वंगु समाचारयात नेपाली सेनां खण्डन याःगु दु । बिहीवाः छगू विज्ञप्ति जारी यासें सेनाः थःपिनिगु पूर्वनिर्धारित तालिम, सैन्य अभ्यास व स्वास्थ्य शिविरय् केन्द्रित जूगु खँ सेनां धाःगु दु । सेनाया विज्ञप्तिइ नेपाःया सेना संविधान, सैनिक ऐन व नेपाल सरकारया नीति व निर्देशन कथं सञ्चालन जुइगु संस्था जूगुलिं नेपाःया सेना थःगु जिम्मेवारी प्रति सजग दु धयातःगु दु ।
LEAVE YOUR COMMENTS