किपुली कलात्मक हाथुद्यः पलिस्था (किपा स्वयादिसँ)

किपू- थनया वडा नं १० स्थित चीथु त्वालय् म्हिगः कलात्मक हाथुद्यः पलिस्था यात । थुगु त्वालय् च्वंगु चीथु फल्चाय् न्हापा न्हापा हाथु हायेकेगु नं चलन दुगु जुयाः आः हानं उगु परम्परायात न्ह्याकेगु लागिं स्थानीय जनताया सक्रियताय् अन हाथुद्यः पलिस्था यायेगु ज्या जूगु खः ।

थुकिया लागिं बुंगय् सिँयाम्ह हाथुद्यः दयेके बियातःगु खःसा म्हिगः तःजिक जात्रा यानाः हाथुद्यःयात किपुली बिज्याकूगु खः । उकिया लागिं म्हिगः किपूया चीथु लिसें बाघ भैरव लागाया स्थानीय जनता झिगः गाडीइ च्वनाः बुंगय् वंगु खःसा अनंनिसें बाजागाजा सहित जात्रा यानाः द्यःयात चीथु त्वालय् बिज्याकूगु खः ।

चीथुलिइ पलिस्था याःगु थुगु हाथु द्यःया उलेज्या किपू नगरपालिकाया प्रमुख रमेश महर्जन व उप– प्रमुख सरस्वती खड्कां त्वाःदेवाय् मत च्याकाः, मू पाहाँ ख्यालि जुजु मदनकृष्ण श्रेष्ठं हाथु रिवन चाना उलेज्या यानादीगु खः ।

ज्याझ्वलय् द्यः पलिस्था यायेत आर्थिक ग्वहालि यानादीपिं सकसितं मू पाहाँ श्रेष्ठं सुभाय् पौ लःल्हानादीगु खःसा नगर प्रमुख महर्जन व उप–प्रमुख खड्कां खादा क्वखायेका हनादीगु खः ।

हाथुद्यः तयेगु चीथु फल्चा किपू नगरपालिकाया ग्वाहालि‌ं पुनर्निर्माण याःगु खः ।