५१ म्ह ज्याथजिथिया मंकाः ज्याःजंक्व

नेपालभाषा टाइम्स

येँ – उमेर त्ययाः नं थीथी कारणं यानाः ज्याःजंक्व याये मखनाच्वंपिं ज्याथजिथिपिंत म्हिगः छगू ज्याझ्वलय् मंकाः जंक्व यायेगु ज्या जुल । थनया मातृ सशक्तीकरण समूह नांगु पुचलं मरुहिति ब्यांक्वेटय् छगू ज्याझ्वः यासें ५१ म्ह ज्याथजिथिपिंत नेवाः परम्परा कथं जंक्व कर्म याःगु खः ।
सहभागी ज्याथजिथिपिं मध्ये ४४ म्ह मिजापिं खःसा ७ म्ह मिजंपिं खः । थुकी निज्वः निम्ह तिपू नं दु ।
ग्वसाः खलःया नायः त्रिपुरालक्ष्मी जोशीं कनादी कथं थुकी ७८ दँ निसें ९५ दँ क्यनेधुंकूपिं ज्याथजिथिपिं दुथ्याःगु खः । थ्व ज्याझ्वःया बारे संस्थां सामाजिक सञ्जाल मार्फत सार्वजनिक सूचं बियागु खःसा उकिया हे लिधंसाय् येँ, यल लिसें ख्वप, थिमि व भ्वतयापिं ज्याथजिथिपिंसं समेत ब्वति काः वःगु खः । थुकिया लागिं माःगु ज्याझ्वः निःशुल्क यानागु खँ नं वय्कलं कनालिद ।
संस्थापाखें थ्व स्वयां न्ह्यः मिजं मस्तय् कुमार पुजा ज्याझ्वः आयोजना याना वयाच्वंगु खः । तर थौंकन्हय् थज्याःगु ज्याझ्वः फुकसिनं याना हःगुलिं न्हूगु ग्वसाःया रूपय् ज्याथजिथिपिनि मंकाः जंक्व यानागु खँ नं मय्जु जोशीं कनादिल ।
उमेर दयां नं आर्थिक, पारिवारिक आदि थीथी कारणं जंक्व यायेगु इच्छा दयाः नं याये मखनाच्वंपिं ज्याथजिथिपिंत थःपिंसं थुकी दुथ्याकागु व थुकिं सहभागी ज्याथजिथिपिं अतिकं लय्ताःगु खँ नं वय्कलं कनादिल ।