लता मंगेश्कर मंत

एजेन्सी- नांजाःम्ह भारतीय गायिका लता मंगेश्कर ९२ दँया वैशय् आइतवाः मंत । छुं न्हि न्ह्यव कोभिड संक्रमण जुयाः अस्पताल भर्ना जूम्ह मंगेश्करयात हप्तौंतक आइसीयुलय् तयाः उपचार यानाच्वंगु खःसां वय्कःयात बचे याये मफुत ।

लता मंगेश्करया निधनयात कयाः भारतीय प्रधानमन्त्री नरेन्द्र मोदी ट्विट यासें देशं गुबलें पूवंके मफइगु ह्याकिं वंगु खँ धाःगुदु ।
न्यय्दँ मल्याक ईया सांगीतिक यात्राया झ्वलय् मंगेश्करं ३६ गू भासं ३० हजारं मल्याक म्येँ हालेधुंकूगु दु । वय्कलं नेपाली भासं नं म्ये हालातःगु दु ।

वय्कःया जन्म सन् १९२९ या सेप्टेम्बर २८ य् भारतया मध्यप्रदेशस्थित इन्दोर सहरय् जूगु खः । न्यादँ दुबलय् हे थः अबु दिनानाथ मंगेश्करपाखें संगीत स्यनाकाःम्ह मंगेश्करं किशोरावस्थाय् हे मराठी फिल्मय् म्येँ हालेगु सुरु याःगु खः । अबुम्ह मदयेधुंकाः मुम्बइ वःम्ह मंगेश्करं उबलय् ध्यबाया निंतिं छुं फिल्मय् अभिनय नं याःगु खःसां लिपा अभिनय याये मंमदु धासें म्येँय् हे केन्द्रीत जूगु खः ।

सन् १९४९ य् वःगु फिल्म महलया म्येँ ‘आएगा, आने वाला…’ पाखें वयात हिन्दी फिल्मया संसारय् सफलताया लँपु चायेकाबिउगु खः । मंगेश्करं हाःगु न्हापांगु हिन्दी भाय्या म्येँ नं थ्व हे खः । थ्व लिपा मंगेश्करं थीथी पुस्ताया अभिनेत्रीतय् निंतिं द्वलंद्वः म्येँ हाःगु दु ।

सन् २००१ य् वय्कःयात भारत रत्न सम्मान लःल्हाःगु खः । थ्व सम्मान भारतीय नागरिकतय्सं कायेखनीगु दकलय् उच्च सम्मान खः । मंगेश्करया केहेँपिं आशा व उषा नं भारतया लोकंह्वाःपिं म्येँ हालामिपिं खः ।