गोरखकाली महायज्ञ बारे ध्यानाकर्षण

येँ- वज्राचार्य संरक्षण गुथिं हनुमानध्वाखा लागाय् जूगु श्री शिव गोरक्ष श्री गोरखकाली महायज्ञया सम्बन्धय् ध्यानाकर्षण जूगु खँ धाःगु दु ।
गुथिपाखें जारी याःगु विज्ञप्तिइ वंगु चैत २१ निसें ०७६ बैशाख १ गते तक युवा विश्व हिन्दू महासंघं ग्वसाः ग्वःगु श्री शिव गोरक्ष श्री गोरखकाली महायज्ञय् संस्थाया छुंं वज्राचार्य गुरुजुपिं सहभागी जूगु खःसां उगु ज्यालिसे संस्थाया छुं नं सरोकार मदुगु धापू स्पष्ट याःगु दु ।

संस्थाया मूछ्यांजे मुणिन्द्ररत्न वज्राचार्यं पित बिउगु विज्ञप्तिइ वज्राचार्य संरक्षण गुथि सकल वज्राचार्यपिनिगु मंकाः संस्था जूगु व संस्थां बौद्ध धर्मदेशना, शिक्षा, प्रवचन बीगु नापं बुद्ध धर्म सम्बन्धी अध्ययन अनुसन्धान यानाः सफू पत्रपत्रिका प्रकाशन यानाः बुद्ध धर्मया प्रचार प्रसार, संरक्षण व संवद्र्धन याना वयाच्वंगु व थुकी संस्था विचलित जुइमखु धयातःगु दु ।

‘संस्था बौद्ध धर्मया विपक्षय् गबलें वनी मखु, नेपाःयात धर्मनिरपेक्ष राष्ट्र दयेकगु संस्थाया चाहना खः’ विज्ञप्तिइ धयातःगु दु । उकथंया गैर बौद्ध धार्मिक क्रियाकलापय् बौद्ध धर्मावलम्बी वज्राचार्यपिं संलग्न मजुइगु खँ नं उकी धयातःगु दु ।