भक्तपुर नगरपालिकायात सुझाब
पुष्प मूनंकःमि
ईया घःमा चाहुलेगु झ्वलय् थौं ई आधुनिकताया घःमाःचाय् बेतोडं ब्वाँय् वनाच्वन । जीवन शैली, रितीथिति दक्व आधुनिकताया यात्राय् न्ह्यानाच्वन । छखे झीगु मौलिक पहिचानया धरोहर मासे जुजुं वनाः लोप हे जुइगु अबस्था वल ।
झीगु पहिचान, झीगु संस्कृति मध्ये पुरातात्विक देगः अले व नापं स्वाःगु थीथी हलंज्वलं तनेगु क्रम आधुनिकताया फय् नापंनापं च्वन्ह्यानाच्वन । महत्व मथुयाः बेवारिस जुयाच्वन । भतिचा ध्यबाया निंतिं अज्याःगु पुराताŒिवक महŒवया सामग्री मियाछ्वत । आः थन ल्यंगु अले छरपस्ट जुयाच्वंगु अज्याःगु अमूल्य सम्पदात संरक्षण यायेगु अले उकियात अभिलेखीकरण याये हथाय् जुइधुंकल । न्यातापोल देगःया डिजाइन थ्यासफू जर्मन नागरिकया ल्हातय् थ्यने धुंकल । अथे हे उकिया थांका नं मिइत्यंबलय् छम्ह पुराताŒिवक महत्व थुम्ह टुरिष्ट गाइडं खनाः वं न्याना सुरक्षित यानातःगु न्यनागु दु ।
नासमना, ब्रम्हपुर (आः बलम्पु धायेगु याः) चुकय् च्वंगु लिच्छबीकालिन शिब लिङ्ग, उकी प्यखेरं महाद्यःया ख्वाःपा दुगु खः । उकियात स्वकःया कुतलय् खुँतय्सं खुयायंके धुंकल । जब कि अन ल्वहँया स्वतँजाःगु देगः दुगु खः, अले जिं अनयाम्ह नारायण झायात थ्व देगःया चित्र थन जःखः सुयाके दयेफु, यदि व दत धाःसा उकिया लिधंसाय् कम्युटरं डिजाइन याना थ्व देगः दनेज्यु धयागु खः ।
दनेत माःगु बजेट नं माला हयेज्यू धयागु खः । अले वं छखाः छेँय् फ्रेमय् ब्वयातःगु लुइकूगु नं खः । तर वं थ्व प्रस्ताव तःबलय् उमिसं व डिजाइन चित्र हे सुचुकाः मरु धयाबिल । लिपा ला व महाद्यः हानं खुया यन, बेपत्ता हे जुल । व महाद्यः पलिस्था याःपिं भट्टाचार्यतय् वंशतय्सं हानं मेम्ह महाद्यः दयेकाः स्थापना ला यात, तर न्हापायागु स्तर मंत । अले ल्वहँयागु गुणस्तर नं मंत । न्यनेदु, अनयाम्ह महाद्यः फ्रान्सया संग्रहालयय् दु । अले देगःया नामय् नःया बार, अले जस्तापाताया पौ तयातःगु दु ।
भक्तपुर नगरपालिकां लाय्कूया देगःया फोटो कयाः सुरक्षित यानातःगु खनेदु । २०७२ सालया तःभुखाचं यक्व देगः स्यंगु व दुंगु दु । थज्याःगु देगःत न्हापा कयातःगु किपा स्वयाः उकिया हे लिधंसाय् जिणोद्वार व पुनःनिर्माण याःगु खः ।
उकिं आः हरेक पुराताŒिवक देगःया नापनक्शा कयाः दयेकातयेगु, फोटो कयाः सुरक्षा यानातयेगु, अन च्वंगु शिलालेखया फोटो कयाः उकियात अभिलेखिकरण यायेगु अले असुरक्षित रुपं लँ वा चुक, देगलय् अथें तयातःगु अज्याःगु सम्पदात सुरक्षित याना तयेगु यात धाःसा भविष्ययात यक्व तिबः जुइ । देवालय क्षेत्र (पीठ व द्यः छेँ) अले विहारय् च्वंगु द्यःया विस्तृत विवरण (गथे कि द्यःया नां, साइज, ल्हाः, ल्हातय् च्वंगु अस्त्र, छ्यं, बस्त्र, आभुषण, आदिया विवरण अले धातु वा ल्वहतं दयेकातःगु) विवरण सहित तल धाःसा कालान्तर तक डाटा सुरक्षित जुइ । अथे हे थन लाय्कू, सिलू महाद्यः क्वय् च्वंगु भैरव द्यःया खवपाखे द्यःया आसन जक ल्यं दनि, द्यः मंत ।
अथे हे ५५ झ्याः क्वय् च्वंगु चिग्वःगु देगलय् न्हापा १८ इञ्च जाःगु ल्वहँया द्यः दुगु खः, लिपा व खुयायंकालि १० इन्च जाःगु मेम्ह द्यः तयातःगु दु ।
अथे हे सम्पदा क्षेत्रय् सि. सि. क्यामेरा जडान यानाबिल धाःसा खुइगु, तनिगु, क्षति यानाबीगु पाखें यक्व हे जोगे जुइ । थन शिलालेख अध्ययन अले मूर्तिया अभिलेखीकरण=लिपिकरण यायेत बरु प्रख्यात इतिहासकार प्रा. डा. पुरुर्षोतम लोचन श्रेष्ठ थेंज्याःपिंत छ्यलेफुगु खःसा वय्कःपिनिगु विद्वता पूरा उपयोग याये दइगु खः । अले वय्कः पाखें सम्पदा क्षेत्रयात योगदान नं ज्वीगु खः ।
धार्मिक क्षेत्र केवल धार्मिक ज्याया निंतिं जक छ्यले दइगु याके माल । यदि अन ब्यापारीक ज्याः याके बिल धासा कालान्तरय् बिकृत, बिसंगती जक हइ ।
LEAVE YOUR COMMENTS